TÜRKMENISTANYŇ HUKUK GORAÝJY EDARALARYNYŇ IŞGÄRLERINIŇ GATNAŞMAGYNDA WAGYZ-NESIHAT DUŞUŞYGY GEÇIRILDI
2025-nji ýylyň 28-nji maýynda Türkmenistanyň Daşary işler ministrliginiň Halkara gatnaşyklary institutynda hukuk goraýjy edaralarynyň gatnaşmagynda talyp ýaşlar üçin wagyz-nesihat duşuşygy geçirildi. Bu çärä Ýaşlar guramasynyň merkezi Geňeşiniň başlygynyň orunbasary D.Durdymuhammedow, Türkmenistanyň Içeri işler ministrliginiň Jenaýat agtaryş müdirliginiň bölüm müdiri, polisiýanyň maýory S. Akmammedow, şeýle-de ministrligiň polisiýanyň ýol gözegçiligi müdirliginiň wekili, polisiýanyň podpolkownigi J.Pygyýew, Türkmenistanyň Demokratik partiýasynyň Syýasy geňeşiniň guramaçylyk syýasy işler bölüminiň müdiriniň orunbasary B.Saparowa, Türkmenistanyň Kärdeşler Arkalaşyklarynyň milli merkeziniň Saglygy goraýyş işgärleriniň kärdeşler arkalaşygynyň Geňeşiniň başlygy P.Kakajaýew, şeýle-de Aşgabat şäher Neşekeşligiň, arakhorlugyň we ruhy keselleriň öňüni alyş merkeziniň wekili A.Täçmämmedowa hem gatnaşdy.
Çykyş edenler ýaşlarda milli mirasymyza bolan sarpany kemala getirmek, sagdyn durmuş ýörelgesine eýermek, watansöýüjilik, edermenlik, arassa ahlaklylyk, halallyk, zähmetsöýerlik ýaly häsiýetleri terbiýelemek maksady bilen, durmuşdan alnan mysallar arkaly çykyş etdiler. Şeýle hem çykyşlarda Gahryman Arkadagymyzyň başlangyjy bilen, hormatly Prezidentimiziň ýolbaşçylygynda häzirki zaman türkmen jemgyýetinde ylymly-bilimli ýaş nesli kemala getirmek, olary milli ruhda terbiýelemek üçin alnyp barylýan işler barada hem aýratyn durup geçdiler.
Duşuşygyň ahyrynda oňa gatnaşyjylar güneşli Diýarymyzy bagtyýar nesilleriň iň arzyly arzuwdyr islegleriniň hasyl bolýan mekanyna öwren, jemgyýetçilik durmuşynyň ähli ugurlarynda kanunlaryň hökmürowanlygy, döwletiň kanun çykaryjy edarasy tarapyndan döwletiň adyndan kabul edilýän kanunlaryň adalatlylyk, ynsanperwerlik, halk häkimiýetliligi, deňhukuklylyk, ynsanyň tebigy hem mizemez hukuklarynyň eldegrilmesizligi ýaly umumy ykrar edilen hukuk ýörelgelerini üpjün edýän hormatly Prezidentimize, türkmen halkynyň Milli Lideri Gahryman Arkadagymyza çäksiz alkyş sözlerini aýtdylar.
Aýlar DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.