TÜRKMENISTANYŇ DÖWLET MEDENIÝET MERKEZINIŇ DÖWLET MUZEÝINE GEZELENÇ GURALDY
2025-nji ýylyň 1-nji maýynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň, institutyň ilkinji Ýaşlar Guramasy bilen bilelikde guramagynda talyp ýaşlar bilen Türkmenistanyň Döwlet Medeniýet merkeziniň Döwlet muzeýine gezelenç guraldy.
Türkmenistanyň Döwlet Medeniýet merkeziniň Döwlet muzeýiniň hünärmenleri gezelenjiň dowamynda talyp ýaşlary muzeýiň baý ekspozisiýasy bilen tanyşdyrdy. Şeýle hem Gahryman Arkadagymyzyň we Arkadagly Gahryman Serdarymyzyň türkmen taryhyny, medeniýetini, sungatyny dünýä tanatmakda tagallalary barada giňişleýin gürrüň berdiler.
Şeýle medeni çäreleriň yzygiderli geçirilmegi ýaşlaryň watançylyk duýgularynyň ösdürilmegine, ruhy dünýäsiniň baýlaşmagyna, taryha we mirasa bolan hormatynyň artmagyna, olaryň medeni-diplomatik tärlerini öwrenmeklige uly täsirini ýetirýär.
Selbi ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.