«TÜRKMENISTANYŇ BÜTINDÜNÝÄ SÖWDA GURAMASY BILEN HYZMATDAŞLYGYŇ GELJEKKI MÜMKINÇILIKLERI» ATLY YLMY-AMALY MASLAHAT
2024-nji ýylyň 29-njy aprelinde Türkmenistanyň Daşary işler ministrligi tarapyndan Halkara gatnaşyklary institutynda «Türkmenistanyň Bütindünýä söwda guramasy bilen hyzmatdaşlygynyň geljekki mümkinçilikleri» atly ylmy-amaly maslahat geçirildi. Bu maslahata Türkmenistanyň Daşary işler ministrliginiň wekilleri, Türkmenistanyň Mejlisiniň, Türkmenistanyň Maliýe we ykdysadyýet ministrliginiň, Türkmen döwlet ykdysadyýet we dolandyryş institutynyň, Türkmen döwlet maliýe institutynyň, Halkara ynsanperwer ylymlary we ösüş uniwersitetiniň professor - mugallymlary we talyp ýaşlary gatnaşdylar.
Maslahatda Türkmenistanyň Daşary işler ministrliginiň Halkara ykdysady hyzmatdaşlyk bölüminiň başlygy, Türkmenistanyň Adatdan daşary we Doly ygtyýarly Ilçisi Atageldi Haljanowyň, Türkmenistanyň Maliýe we ykdysadyýet ministrligiň Bütindünýä söwda guramasy bilen hyzmatdaşlyk bölüminiň başlygy Ylham Ýaraşowyň, Türkmenistanyň Mejlisiniň deputaty Ykdysady meseleler baradaky komitetiniň agzasy Gurbangeldi Aşyrowyň we Bütindünýä söwda guramasynyň Birikdirmeler bölüminiň hünärmeni Anna Warýanikiň sanly ulgam arkaly çykyşy diňlenildi. Maslahatda çykyş edenler 2024-nji ýylyň 22-nji fewralynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Türkmenistanyň Halk Maslahatynyň Prezidiumynyň mejlisinde eden çykyşynda öňde goýlan wezipeleriň hatarynda Türkmenistan bilen Bütindünýä söwda guramasynyň arasyndaky hyzmatdaşlygyň geljekki mümkinçilikleri barada belläp geçdiler.
Ýeri gelende bellesek, 2024-nji ýylyň 26-njy aprelinde Türkmenistanyň Daşary işler ministrliginde Türkmenistanyň Bütindünýä Söwda Guramasyna (BSG) agza bolmagy bilen bagly meseleleri öwrenmek boýunça Hökümet toparynyň nobatdaky mejlisi geçirildi. Mejlisiň çäklerinde çykyş edenler 2020-nji ýylyň iýul aýynda bu guramada Türkmenistanyň synçy derejesini alandygyny, 2022-nji ýylyň fewral aýynda BSG-niň Ženewada geçirilen Baş Geňeşiniň nobatdaky mejlisinde ýurdumyzyň BSG-niň doly hukukly agzasy bolmak üçin ýüz tutmagynyň netijesinde Türkmenistana BSG-na goşulyşýan döwlet (“işjeň synçy”) derejesini bermek hakynda karara gelnendigini, şeýle hem BSG-niň Sekretariaty bilen hyzmatdaşlygy giňeltmekde öňde duran birnäçe ugurlar barada teklipler öňe sürlendigi aýdyldy.
Maslahatyň ahyrynda oňa gatnaşyjylar Türkmenistanyň daşary söwda gatnaşyklaryny ösdürmek babatynda halkara hyzmatdaşlygyny dünýäde dabaralandyrýan Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.
Perhat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň
uly mugallymy.