Türkmenistanyň Aktau şäherindäki Konsuly bilen duşuşyk geçirildi
2022-nji ýylyň 27-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw Merkezinde “Ulag diplomatiýasy” boýunça Türkmenistanyň Gazagystanyň Aktau şäherindäki konsuly Muhammetnur Öwezowyň , şeýle hem institutyň talyplarynyň gatnaşmagynda täsirli okuw sapagy geçirildi. Bu okuw sapagy Türkmenistan bilen Gazagystan Respublikasynyň arasyndaky ulag ulgamyndaky hyzmatdaşlygyna bagyşlanyp, hyzmatdaşlygyň ileri tutulýan ugurlary barada gürrüň edildi.
Konsul Muhammetnur Öwezow okuw sapagynyň dowamynda ulag pudagynyň Türkmenistan bilen Gazagystan Respublikasynyň arasyndaky gatnaşyklarynyň möhüm ugurlarynyň biridigini belläp, bu ugurda ikitaraplaýyn hem-de köptaraplaýyn görnüşde hyzmatdaşlygyň yzygiderli ýokarlanýandygyny nygtady.
Tejribeli Konsul iki ýurduň arasyndaky özara hormat goýmak ýörelgelerine esaslanýan dost-doganlyk gatnaşyklary barada gürüň açyp, Türkmenistan bilen Gazagystan Respublikasynyň arasyndaky syýasy, söwda-ykdysady, medeni-ynsanperwer, ulag diplomatik gatnaşyklaryň önjeýli ösüşine hem ýokary baha berdi. Geçirilen täsirli okuw sapagy talyplar üçin gyzykly bolup, olar ulag diplomatiýasy bilen bagly, özlerini gyzyklandyrýan sowallara giňişleýin jogap aldylar.
Ogulgurban ÇARYGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.