Türkmenistandaky Birleşen Milletler Guramasynyň wekilhanasyna gezelenç gurnaldy
2022-nji ýylyň 19-njy maýynda Türkmenistanyň Daşary işler ministrliginiň Halkara gatnaşyklary institutynyň Ýaş diplomatlaryň mekdebiniň agzalarynyň gatnaşmagynda Birleşen Milletler Guramasynyň Türkmenistandaky wekilhanasyna gyzykly gezelenç gurnaldy.
Talyplar we mekdep okuwçylary bu ýerde wekilhananyň alyp barýan işleri, Birleşen Milletler Guramasy baradaky gyzykly maglumatlary, okuw çykyşlaryny we hyzmatdaşlygyň şu wagta çenli ýeten sepgitleri we mundan beýläk garaşylýan netijeleri bilen tanyşdylar.
Türkmenistan bu abraýly halkara guramasy hem-de onuň agentlikleri bilen parahatçylyk, howpsuzlyk we durnukly ösüş ulgamynda hyzmatdaşlygy netijeli ösdürilýär. Türkmenistan bilen BMG-niň arasynda 2021 — 2025-nji ýyllar üçin durnukly ösüş ugrunda hyzmatdaşlygyň çarçuwaly maksatnamasyny hemmetaraplaýyn durmuşa geçirmek ugrunda hyzmatdaşlyk alnyp barylýar.
Gurnalan gezelenç Ýaş diplomatlaryň mekdebiniň agzalarynyň bilimlerini we ukyp-başarnyklarynynyň kämilleşmegine we olaryň bu ugurda gyzyklanmasynyň has-da artmagyna getirdi. Gezelenjiň ahyrynda oňa gatnaşanlar özleriniň ukyp-başarnyklaryny, zehin aýratynlyklaryny açyp görkezmäge döredip berýän giň mümkinçilikleri üçin hormatly Prezidentimize tüýs ýürekden çykýan hoşallyk sözlerini aýtdylar.
Şamyrat AŞYRMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.