Türkmenistanda wodorod energetikasyny ösdürmegiň mümkinçilikleri
2021-nji ýylyň 29-njy oktýabrynda Türkmenistanyň Daşary işler ministrliginiň Halkara gatnaşyklar institutynda “Türkmenistanda wodorod energetikasyny ösdürmegiň mümkinçilikleri” atly wideoaragatnaşyk arkaly ylmy-amaly maslahat geçirildi. Bu maslahata Türkmenistanyň Döwlet energetika institutynyň “Gaýtadan dikeldilýän energiýa çeşmeleri” ylmy-önümçilik merkeziniň, Ýagşygeldi Kakaýew adyndaky Halkara nebit we gaz uniwersitetiniň Innowasiýa ylmy-okuw merkeziniň we Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw merkeziniň agzalary, ýagny bu ýokary okuw mekdepleriniň mugallymlary we talyp ýaşlary gatnaşdylar.
Maslahatda Türkmenistanda wodorod energetikasyny ösdürmek boýunça birnäçe toplumlaýyn maksatnamalara garaldy we bu meseleler boýunça çykyşlar edildi. Bu ylmy-amaly maslahatda oňa gatnaşan professor-mugallymlaryň, alymlaryň we bilermenleriň pikirleri diňlenildi, nukdaýnazarlary we teklipleri ara alnyp maslahatlaşyldy. Şeýle-de çykyşlarda hormatly Prezidentimiziň energiýa serişdelerini gaýtadan dikeltmek, wodorod we energiýa tygşytlaýjy tehnologiýalar ulgamyna innowasiýalary ornaşdyrmak barada alyp barýan öňdengörüjilikli syýasaty dogrusynda bellenildi.
Bu maslahatyň esasy maksady energetika diplomatiýasyny ösdürmegiň 2021-2025-nji ýyllar üçin Maksatnamasyny durmuşa geçirmekden, energetika pudagynda ileri tutulýan ugurlara syn bermekden ybarat boldy. Şeýle hem çykyşlarda wodorod energiýasynyň ekologiki taýdan arassalygy we amatly energiýa çeşmesi bolup durýandygy barada düýpli maglumatlar bellenilip geçildi.
Kerim BAÝMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.