Türkmenistanda iňlis dilini okatmagy ösdürmek boýunça duşuşyk
Beýik Britaniýanyň Daşary ýurtdaky meýletinçilik gullugynyň (VSO) global tehniki ýolbaşçysy Purna Kumar Şrestanyň we global tejribe ýolbaşçysy Joýs Leýkeriň Türkmenistanda iňlis dilini okatmagy ösdürmek bilen bagly meseleleri ara alyp maslahatlaşmak üçin Türkmenistana amala aşyrýan saparynyň çäklerinde 2025-nji ýylyň 27-nji ýanwarynda Türkmenistanyň Daşary işler ministrliginiň Halkara gatnaşyklary institutynda “tegelek stoluň” başyndaky duşuşyk geçirildi. Duşuşyga Türkmenistanyň Daşary işler ministrliginiň Halkara gatnaşyklary institutynyň ylmy işler boýunça prorektory Begenç Mätliýew, institutyň halkara gatnaşyklary fakultetiniň dekany Merdan Berdinyýazow, Dünýä dilleri kafedrasynyň müdiri Maýa Atajanowa gatnaşdy.
Duşuşygyň barşynda britan wekiliýeti türkmen diplomatiýasynyň ýokary okuw mekdebiniň düzümi, okadylýan hünärler, ugurlar, ýöriteleşdirilen merkezler, halkara hyzmatdaşlygy boýunça alnyp barylýan işler, hususan-da iňlis diliniň okadylyşy barada içgin tanyşdyryldy.
Taraplar iňlis dilini okatmakda döwrebap usullary ornaşdyrmak, şol sanda mugallymlaryň hünär derejesini ýokarlandyrmak we innowasion usulyýetleri ulanmak ýaly meseleleri ara alyp maslahatlaşdylar. Beýik Britaniýa bilen Türkmenistanyň bilim edaralarynyň arasyndaky akademiki aragatnaşyklary berkitmegiň möhümligi aýratyn bellenildi.
Bu duşuşyk Türkmenistan bilen Beýik Britaniýanyň arasyndaky bilimi we iňlis dilini okatmagy kämilleşdirmekdäki, talyp ýaşlaryň we mekdep okuwçylarynyň dili öwrenmek babatynda başlangyçlary ilerletmekdäki ikitaraplaýyn hyzmatdaşlygy berkitmekde ýene-de bir möhüm ädim boldy.
Ogulbeg GAZAKOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.