Türkmenistan — BMG: hoşniýetli gatnaşyklaryň belent nusgasy
Häzirki ajaýyp döwrümizde ýurdumyzyň hemişelik Bitaraplygyna esaslanýan parahatçylyk söýüjilik ýörelgesi ösdürilýär. Şu ýörelgelere esaslanyp, Türkmenistan Birleşen Milletler Guramasy bilen köptaraply, oňyn strategik hyzmatdaşlygy alyp barýar. Hyzmatdaşlygyň geçen 31 ýylynda bu abraýly gurama bilen bilelikde durmuşa geçirilen işler, gazanylan üstünlikler Türkmenistanyň dünýä jemgyýetçiliginde derwaýys meselelere öz wagtynda mynasyp çözgütleri hödürleýändiginiň aýdyň mysaly bolup durýar.
Hyzmatdaşlygyň taryhy menzillerine ser salsak, Garaşsyz, hemişelik Bitarap Türkmenistanyň BMG-niň Baş Assambleýasynyň 58-nji, 62-nji, 64-nji, 68-nji, 71-nji, 75-nji we 77-nji mejlisleriniň wise-başlyklygyna saýlanylandygyny buýsançly ýatlaýarys. Garaşsyzlyk ýyllary içinde Türkmenistan BMG-niň Baş Assambleýasynyň ençeme Kararnamalarynyň awtory hökmünde çykyş etdi. Munuň özi ýurdumyzyň öňe sürýän başlangyçlarynyň giň goldawa, ykrarnama eýe bolýandygynyň aýdyň beýanydyr.
BMG-niň Baş Assambleýasynyň 2023-nji ýylyň sentýabr aýynda açylýan 78-nji sessiýasynda döwletimiziň ählumumy ösüşiň esasy ugurlary boýunça netijeli gatnaşyklary mundan beýläk-de pugtalandyrmaga we giňeltmäge gönükdirilen täze başlangyçlary beýan ediler. Türkmenistanyň ileri tutýan garaýyşlarynyň hatarynda lukmançylyk diplomatiýasyna degişlileriň hem bardygyny bellemek gerek.
Mälim bolşy ýaly, Türkmenistanyň lukmançylyk tejribeleri halkara derejede ykrar edilýär. Munuň özi lukmançylyk diplomatiýasynda halkara hyzmatdaşlygy ilerletmek zerurlygyny ýüze çykarýar. Saglygy goraýyş ulgamyndaky hyzmatdaşlyk Türkmenistanyň daşary syýasatynyň möhüm ugurlarynyň biridir.
Daşary işler ministrliginiň habar berşi ýaly, Birleşen Milletler Guramasynyň Baş Assambleýasynyň Nýu-Ýorkda açylýan nobatdaky sessiýasynda Türkmenistan 2023-nji ýylyň dekabrynda Goşulyşmazlyk Hereketiniň çäklerinde ýokanç keseller boýunça halkara ylmy maslahaty, şeýle hem 2024-nji ýylyň aprelinde BSGG-niň Ýewropa sebit edarasy bilen bilelikde, «Saglyk — 2020» syýasatynyň düzgünleri bilen baglylykda, ýokanç däl keselleriň öňüni almak we olara garşy göreşmek boýunça Aşgabat Jarnamasynyň 10 ýyllygyna bagyşlanan ýokanç däl keseller boýunça ministrler derejesindäki Ýewropa maslahatyny geçirmegi teklip edýär. Şonuň üçin hem dünýäde parahatçylygy we durnuklylygy pugtalandyrmakda, durnukly ösüşi üpjün etmekde lukmançylyk diplomatiýasyna hem uly orun degişlidir.
Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda Watanymyz saýlap alan döredijilikli daşary syýasy ugry bilen öňe gitmegini dowam edýär. Bu syýasatyň nobatdaky döwür üçin esasy ugurlary 2022 — 2028-nji ýyllar üçin degişli Konsepsiýada bellenilendir. Dünýäde parahatçylyk söýüjilik ýörelgelerini ösdürýän türkmen halkynyň Milli Lideri Gahryman Arkadagymyzyň hem-de Arkadagly Serdarymyzyň janlary sag bolsun, beýik işleri rowaçlyklara beslensin!
Aýgözel ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň aspiranty.
Çeşme şu ýerden alnan:
"Mugallymlari" gazeti 06.09.2023ý.