«Türkmen medeniýeti we Magtymguly Pyragynyň edebi mirasy» atly metbugat maslahaty geçirildi
2024-nji ýylyň 27-nji noýabrynda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasynyň guramagynda «Türkmen medeniýeti we Magtymguly Pyragynyň edebi mirasy» atly metbugat maslahaty geçirildi. Oňa Halkara žurnalistikasy fakultetiniň professor-mugallymlary, bagtyýar talyp ýaşlar, köpçülikleýin habar beriş serişdeleriniň wekilleri gatnaşdylar.
Maslahatda çykyş edenler Gündogaryň beýik akyldary, filosof Magtymguly Pyragynyň edebi mirasy, onuň dürdäne şygyrlarynyň ýaş nesillerde watançylyk, mertlik, ynsanperwerlik duýgularyny kämilleşdirmekdäki ähmiýeti, şeýle-de akyldar şahyryň umman ýaly çuň döredijiligini metbugat sahypalarynda şöhlelendirmekde alnyp barylýan işler dogrusynda belläp geçdiler.
Şeýle maslahatlaryň yzygiderli geçirilmegi türkmen diplomatiýasynyň milli mekdebiniň talyplary bolan geljekki halkaraçy žurnalistleriň hemmetaraplaýyn bilimleriniň artmagyna, olaryň hünär taýdan kämilleşmeklerine uly goşant goşýar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.