Türkmen-gruzin gatnaşyklarynyň gerimi giňeýär
2022-nji ýylyň 22-nji dekabrynda Türkmenistanyň Daşary işler ministrliginiň Halkara gatnaşyklary institutyndaky Türkmenistanyň diplomatiýasynyň möhüm ugurlary boýunça okuw Merkeziniň çäklerinde (TDMUOM) Türkmenistanyň Gruziýadaky Adatdan daşary we Doly ygtyýarly Ilçisi Döwletmyrat Muratow bilen institutyň talyplarynyň gatnaşmagynda «Ulag diplomatiýasy» boýunça duşuşyk geçirildi.
Diplomat duşuşygyň dowamynda türkmen-gruzin gatnaşyklarynyň ýylsaýyn geriminiň giňelýändigi, hyzmatdaşlygyň häzirki ýagdaýy we geljegi, ikitaraplaýyn hem-de köptaraplaýyn gatnaşyklaryny ösdürmekde durmuşa geçirilýän işler barada gürrüň berdi. Ilçi Türkmenistanyň we Gruziýanyň arasyndaky syýasy, söwda-ykdysady, ulag-aragatnaşyk, ylym-bilim, medeni-ynsanperwer gatnaşyklaryny mundan beýläk-de ösdürmek üçin uly mümkinçilikleriň bardygyna ünsi çekip, muňa mysal hökmünde türkmen-gruzin söwda dolanyşygynyň ýylba-ýyldan artýandygyny nygtady. Şeýle hem Ilçi D.Muratow Türkmenistanyň Gruziýa bilen özara bähbitli hyzmatdaşlygynyň netijeli häsiýete eýedigini belläp, ulag-aragatnaşyk ulgamynda «Lapis Lazuli» adyny alan Owganystan — Türkmenistan — Azerbaýjan — Gruziýa — Türkiýe ulag-üstaşyr geçelgesiniň ähmiýeti dogrusynda giňişleýin gürrüň berdi.
Täsirli geçen duşuşygyň ahyrynda Ilçi D.Muratow talyplaryň türkmen-gruzin gatnaşyklary hakda beren sowallaryna giňişleýin we takyk jogap berdi.
Senemgül ALLAKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.