Türkmen bilermenleri terrorçylyga garşy çäreler baradaky maslahata gatnaşdylar
Soňky onýyllyklarda terrorçylyga garşy meseleler halkara jemgyýetçiliginiň ünsüni özüne çekýän meselä öwrüldi. Bu howpuň öňüni almakda we onuň esasy sebäplerine düşünmekde öňegidişlik gazanylsa-da, terrorçylyk halkara jemgyýetçiliginiň öňünde durýan iň uly howplaryň biri bolup galýar.
Ýaňy-ýakynda Birleşen Milletler Guramasynyň Aşgabat şäherindäki
wekilhanasynda türkmen hünärmenleri üçin Merkezi Aziýada Terrorçylyga garşy
irki duýduryş torunyň çäginde sebitleýin seminar geçirildi. BMG-nyň Terrorçylyga
garşy edarasy (UNOCT), Merkezi Aziýanyň Öňüni alyş diplomatiýasy merkezi
(UNRCCA) we Parahatçylyk we ösüş gaznasy tarapyndan guralan bu seminara
ýurduň harby we hukuk goraýjy edaralaryndan, Türkmenistanyň Daşary Işler
ministrliginiň Halkara gatnaşyklary institutynyň Strategik barlaglar boýunça ylmy
merkezinden wekiller çagyryldy.
Çäräniň maksady hukuk goraýjy we howpsuzlyk edaralarynyň, beýleki ygtyýarly sebit guramalarynyň bilermenleriň arasynda hyzmatdaşlygy we utgaşdyrmagy giňeltmek bolup durýar. Ýagny, seminar terrorçylyga garşy göreşde sebit mehanizmlerini güýçlendirmek we terrorçylyga garşy täsirli strategiýalary, terrorçylyk wehimlerine garşy ýeterlik derejede gaýtawul bermek boýunça degişli çäreleri işläp düzmäge gönükdirilendir.
Maslahata gatnaşyjylar sebit derejesinde irki duýduryş torunyň işi üçin mundan beýläkki ädimleri hem ara alyp maslahatlaşýarlar. Şeýle hem bu ugurdaky dürli çeşmelerden gowuşýan maglumatlary seljerip, olara baha bermek we dogry netije çykarmak boýunça gyzgalaňly diskussiýalar edildi.
Maslahatda terrorçylygyň maliýeleşdirilmegine garşy göreş, serhet howpsuzlygy, internetde radikalizme garşy durmak, kiberhowpsuzlyk barada, şeýle hem zorlukly ekstremizmiň öňüni almakda metbugatyň we dini guramalaryň roly ýaly meseleleriň üstünde durulyp geçildi.
Terrorçylyk hereketleriniň tehnologiki özgerişler, köpçülikleýin habar beriş serişdeleriniň ösüşi we tiz ösýän IT tehnologiýalarynyň fonunda maglumat ýaýratmagyň usullary babatynda hil taýdan täze görnüşlere eýe bolýandygy, aýratyn-da täsirli garşylyklaýyn çäreleri talap edýändigi bilermenler tarapyndan bellendi.
Maslahat hukuk goraýjy edaralaryň, gümrük we serhet gullularynyň we beýleki degişli edaralaryň bilermenleri üçin oňyn tejribe alyşmak jähtinden gaty peýdaly boldy. Çäräni gurnaýjylar we türkmen wekilleri maslahatyň guralandygy we işjeň gatnaşylandygy üçin birek-birege hoşallyklaryny bildirdiler.
Türkmenistanyň Daşary Işler ministrliginiň
Halkara gatnaşyklary institutynyň
Strategik barlaglar boýunça merkeziniň
ylmy işgäri Döwletmyrat MÄMMEDOW