TIMUN 2025 “Tashkent International Model United Nations Conference” atly halkara maslahat
2025-nji ýylyň 23-25-nji maýynda Türkmenistanyň Daşary işler ministrliginiň Halkara gatnaşyklary institutynyň talyplary Özbegistan Respublikasynyň Daşkent şäherinde ýerleşýän Halkara Westminster uniwersitetiniň guramagynda Merkezi Aziýada BMG-niň iň uly konferensiýalarynyň biri bolan TIMUN 2025 “Tashkent International Model United Nations Conference” atly geçirilen halkara maslahatyna gatnaşdylar.
Bu maslahata Halkara hukugy hünäriniň talyby Nurmyrat Azadow, Halkara ykdysady gatnaşyklary hünäriniň talyplary Atajan Orazlyýew, Mekan Azadow hem-de olara ýolbaşçylyk eden Halkara hukugy we deňeşirme hukuk öwreniş kafedrasynyň uly mugallymy Dürli Ballyýewa gatnaşdylar. Maslahat dünýäniň 400-den gowrak wekillerini özünde jemläp, häzirki halkara we sebit meselelerini çuňňur öwrenmek hem-de ýaşlara diplomatiýada, halkara gatnaşyklarynda gepleşikleri geçirmek ukyplaryny ösdürmek mümkinçiliklerini berýär.
TIMUN döredilen gününden bäri talyp ýaşlaryň gatnaşmagynda BMG-niň dürli guramalarynyň, komitetleriniň, edararalarynyň hyzmatdaşlary tarapyndan goldanylyp ykrar edilen uly platforma öwrüldi. Bu maslahat ýaşlaryň pikir alyşmagy we global kynçylyklary öwrenmek üçin sebit merkezine öwrüldi. Bu maslahatyň dowamynda BMG-niň komitetiniň işini simulirlemek, kararlary ara alyp maslahatlaşmak we global möhüm meseleler boýunça oýlanyşykly we çekişmeli gepleşikleri geçirmek başarnyklary ösdürmek bilen bagly çykyş edildi.
Şu ýylky mowzugy TIMUN 2025 “Geljek üçin bilelikde, ýaşlar bilen bilelikde” ady bilen geçirilmegi hem ilkinji nobatda BMG-niň Düzgünnamasyna ygrarlydygyny we geljekdäki iş merkezinde ýaşlara bolan ynamy görkezýär.
Nurmyrat AZADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň V ýyl talyby.