Teoriýadan — tejribelige
Watanymyzda ýaş žurnalistlere döredilýän mümkinçiliklerden köňlümiz ganatlanyp, biz hem tanyşlyk tejribeligimizi has-da mazmunly geçirmek maksady bilen, institutymyzyň okuw studiýasynda gyzgalaňly işleri alyp barýarys. Tutuş bir ýylyň dowamynda halypa mugallymlarymyz tarapyndan nazaryýetde alan bilimlerimizi tejribe üsti bilen berkitmegimiz bizi has-da kämilleşdirdi.
Her gün säher bilen irdenki nyzamdan soňra, institutymyzda tejribelige bellenen talyp deň-duşlarymyz bilen okuw studiýamyzda ýygnanyşyp, günüň dowamynda ýerine ýetirmeli işlerimizi ara alyp maslahatlaşýarys. Gysgajyk ýygnanyşykdan soňra her kim öz işine gümra bolýar. Geliň, olaryň käbirleriniň edýän işleri bilen tanyş bolalyň:
Humaý Meredowa — «Adobe Premiere Pro» programmasynda ussat halypa diplomatymyz Amangeldi Rahmanowyň 80 ýaş ýubileýine bagyşlanan dokumental filminiň kebşirleme, bezeg we dizaýn işlerini ýerine ýetirýär.
Amangeldi Ýegenow — «Ussat» dokumental filmler taslamasynyň halypa heýkeltaraş Saragt Babaýewiň döredijiligine bagyşlanan täze sanynyň soňky pursatlarynyň üstünde işleýär. Oňa ýakyn wagtda tomaşa edip bilersiňiz!
Döwletgeldi Borjakow we Serdar Borjakow — bilýänsiňiz, olar biziň institutymyzyň «gözli şaýatlary», olar häzirki zaman kamera enjamlaryna ussatlyk bilen erk edip, tejribelik döwründe özleriniň täze şägirtlerini taýýarlaýarlar.
Geldimyrat Tagyýew — «3D MAX» programmasynda akyldar şahyrymyz Magtymguly Pyragynyň täze çap edilen kitabynyň animasiýa we dizaýn işini ýerine ýetirýän bolsa, Seýran Sopyýew dürli saýtlardan Watanymyzda, sebitde we dünýäde bolup geçýän möhüm wakalary yzarlap, «Hepdäniň habarlary» gepleşiginiň täze sanyna taýýarlyk görýär, men bolsa Humaý Meredowanyň ýardamy bilen «Hepdäniň habarlary» gepleşiginiň kebşirleme we bezeg işleriniň ýerine ýetirilişini öwrenýärin.
Okuw studiýamyzyň agzalary diňe bular bilen çäklenmeýär, wideo şekilleriniň kebşirleme işleriniň inçe syrlaryny öwrenmek isleýän höwesekler hem az däl, kimsi radioýazgy bilen, kimsi täze makala ýazmak bilen, kimsi bolsa surat bezeginiň işleri bilen gümra. Garaz, her kim tomusky dynç alşyna gaýtmazyndan ozal, okuw studiýamyzyň işine özüniň goşandyny goşmak bilen başagaý. Biz bolsa, talyp deň-duşlarymyza mundan beýläk-de has hem kämilleşip, okuwlarynda, işlerinde uly üstünlikleri gazanyp, Watanymyzyň abraýyny dünýä ýaýjak, öz işine erjel, kämil žurnalistler bolup ýetişmeklerini arzuw edýäris.
Aýsona AMANJAÝEWA,
Halkara žurnalistikasy fakultetiniň I ýyl talyby.
«Ýaş diplomatyň sesi»
2024-nji ýylyň 20-nji iýuly. Ýörite tejribelik sany.