Tehnologiýalar merkezinde geçirilen ylmy-amaly maslahat
2023-nji ýylyň 15-nji fewralynda Tehnologiýalar merkeziniň uly mejlisler zalynda "Durnukly ösüş maksatlary: Ýaşlar syýasaty we innowasion tehnologiýalar" atly ylmy-amaly maslahat geçirildi. Türkmenistanyň Bilim ministrliginiň we Türkmenistanyň Ylymlar akademiýasynyň bilelikde guramagynda geçirilen bu ylmy-amaly maslahata ýokary okuw mekdepleriň, pudaklaýyn ylmy edaralaryň we Türkmenistanyň Ylymlar akademiýasynyň ylmy-barlag institutlarynyň ýaş alymlary we köpçülikleýin habar beriş serişdeleriniň wekilleri gatnaşdylar.
Ylmy-amaly maslahatyň dowamynda çykyş edenler ýurdumyzyň ylmy-barlag institutlarynda ýaş alymlary ylmy-tehniki barlaglara çekmek babatda alnyp barylýan işler dogrusynda nygtap geçdiler. Eziz Diýarymyzda ýaşlar aýratyn orunda durýar. Ýurdumyzyň innowasion ösüşinde ýaş alymlaryň ylmy açyşlary uly ähmiýete eýedir. Çykyşlaryň dowamynda bu barada aýdylanlar ylmy-amaly maslahata gatnaşanlarda aýratyn täsir galdyrdy.
Şeýle-de Tehnologiýalar merkeziniň girelgesinde maslahat bilen baglanyşykly ýörite sergi guraldy. Serginiň dowamynda ýurdumyzyň ýaş alymlarynyň ylmy-taslama işleriniň nusgalary görkezildi.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň mugallymy.