“TEBIGAT BIZIŇ ÖÝÜMIZDIR, ONY AÝAWLY SAKLALYŇ!” ATLY ŞYGAR BILEN ARASSAÇYLYK BOÝUNÇA YNSANPERWERLIK ÇÄRESI GEÇIRILDI
2026-njy ýylyň 11-nji aprelinde hepdäniň dynç güni Türkmenistanyň Daşary işler ministrliginiň Halkara gatnaşyklary institutynyň Ýaş alymlar geňeşiniň we ylmy-döredijilik gurnaklarynyň işjeň agzalarynyň gatnaşmagynda ýaş nesliň ekologik medeniýetini ösdürmek, tebigatymyzy gözelleşdirmäge, daş-töweregimizi arassa we aýawly saklamaga öz goşantlaryny goşmak maksady bilen arassaçylyk boýunça ynsanperwerlik çäresi geçirildi.
Şeýle ynsanperwer çärä gatnaşan her bir ýaş nesliň ýüreklerinde buýsanç bar. Çünki, tebigat biziň öýümizdir, ýaşaýyş gurşawymyzdyr. Bu gurşawda özboluşly medeniýet kemala gelip, edil adamlaryň birek-birek bilen mähirli gatnaşyşy ýaly, adam bilen tebigatyň arasynda hem hormat goýmak, goramak we aýawly çemeleşmek ýaly ýörelgelere utgaşyp gidýän ekologik medeniýet kemala gelýär. Bu bolsa olarda tebigata bolan söýgini has-da artdyrmaga oňyn täsirini ýetirýär.
Ösüp gelýän ýaş nesillerde tebigaty goramak, onuň gymmatlyklaryna aýawly çemeleşmek we hormat goýmak ýörelgelerinde terbiýe bermek, ýaş nesilleriň arasynda ekologik medeniýetiň derejesini ýokarlandyrmak döwletimiziň ileri tutýan esasy ugurlarynyň biridir. Şeýle belent wezipäni amala aşyrmakda ýaşlaryň ekologik çärelere gatnaşmagyny üpjün etmek möhüm ähmiýete eýedir.
Şamuhammet ELÝASOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.