Täze ýyl baýramçylygyny ýokary guramaçylykly geçirmeklik boýunça wagyz-nesihat duşuşygy
2023-nji ýylyň 13-nji dekabrynda Türkmenistanyň Daşary işler ministrliginiň Halkara gatnaşyklary institutynda mugallymlaryň we talyp ýaşlaryň gatnaşmagynda Täze ýyl baýramçylygyny ýokary guramaçylykly geçirmek boýunça wagyz-nesihat duşuşygy geçirildi. Duşuşykda Täze ýyl baýramçylygyny ýokary guramaçylykly geçirmek boýunça ýaşlaryň arasynda terbiýeçilik işlerini güýçlendirmek, olaryň ýüze çykýan nogsanlyklardan daşda durmaklaryny gazanmak, hukuk bilimlerini artdyrmak, zyýanly endikleriň, şol sanda partlaýjy maddalaryň adamyň saglygyna ýetirýän zyýany baradaky sowatlylygyny ýokarlandyrmak, hukuk bozulmalarynyň öňüni almak hem-de türkmeniň döwletlilik ýörelgeleri, milli däp-dessurlarymyz we onuň ähmiýeti barada giňişleýin gürrüň edildi.
Duşuşygyň dowamynda saglygymyza we töweregimizdäki adamlaryň saglygyna howp döredip biljek ýagdaýlara ýol bermezlik, ýurdumyzda bellenilýän ähli baýramçylyklary ýokary derejede guramaçylykly bellemekligi hem-de ýaşlaryň özlerini medeniýetli alyp barmaklygy barada aýdylyp geçildi.
Maslahatda çykyş edenler Berkarar döwletiň täze eýýamynyň Galkynyşy döwründe Garaşsyz, hemişelik Bitarap Türkmenistan döwletimizde her bir raýat hakynda taýsyz tagallalary hem-de ýadawsyz aladalary edýän türkmen halkynyň Milli Lideri, Gahryman we mähriban Arkadagymyza, Arkadagly Gahryman Serdarymyza köp sagbolsunlaryny aýtdylar.
Gülöwser REJEPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
II ýyl talyby.