TÄZE OKUW MÖWSÜMINE ÇAGYRYŞ
2024-nji ýylyň 21-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Senagatçylar we Telekeçiler partiýasynyň Aşgabat şäher komitetiniň wekilleriniň we «Gujurly bilim» hojalyk jemgyýetiniň hünärmenleriniň gatnaşmagynda talyplar bilen duşuşyk geçirildi.
«Gujurly bilim» hojalyk jemgyýetiniň hünärmenleri öz çykyşlarynda merkeziň
dürli ýaşdaky diňleýjiler üçin hödürleýän bilim hyzmatlarynyň kämilligi we köpgörnüşliligi barada täsirli maglumatlary beýan etdiler. Kitap okamagyň ähmiýeti, adamzadyň durmuşynda kitabyň tutýan orny dogrusynda görkezilen wideoşekiller bilim almagyň, saýlan ugruňdan kemsiz baş çykarmagyň, maksada okgunly hereket etmegiň möhümdigini aýdyňlygy bilen subut etdi.
Duşuşygyň ahyrynda talyplar bilen sorag-jogaplaryň alşylmagy has-da şowhunly boldy. Hödürlenen soraglara dogry jogap bermegi başaran talyplara «Gujurly bilim» hojalyk jemgyýetiniň sowgatlary gowşuryldy. Duşuşyk talyplarda täsirli duýgulary döretmek bilen özlerinde täze pikirleriň, düşünjeleriň emele gelmegi esasynda jemlendi.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.