Talyplarymyzyň üstünlikleri
2022-nji ýylyň 14-nji iýulynda Türkmenistanyň Jemgyýetçilik guramalarynyň merkezinde Türkmenistanyň Ýaşlar guramasynyň Merkezi geňeşiniň we "Biznes-reklama" gazetiniň bilelikde Medeniýet we sungat işgärleriniň hem-de Magtymguly Pyragynyň şygryýet güni mynasybetli yglan eden "Arkadagly zamananyň dörediji ýaşlary" atly döredijilik bäsleşiginiň jemi jemlendi. Bu bäsleşikde Türkmenistanyň Daşary işler ministrliginiň Halkara gatnaşyklary institutynyň talyplary üstünlikli çykyş edip, bäsleşigiň 1-nji ornuna Halkara žurnalistikasy fakultetiniň I ýyl talyby Gurbansähet Gurbansähedow mynasyp boldy. Şeýle-de şol fakultetiň talyplary bolan Sona Halykowa we Aýlar Atajykowa bäsleşigiň höweslendiriji baýragyny eýelemegi başardy.
Ady agzalan bäsleşik bilen birlikde Türkmenistanyň Ýaşlar guramasynyň Merkezi geňeşiniň we Türkmenistanyň Sport we ýaşlar syýasaty ministrliginiň "Türkmenistan Sport" halkara žurnalynyň bilelikde Medeniýet we sungat işgärleriniň hem-de Magtymguly Pyragynyň şygryýet güni, şeýle hem Sport žurnalistleriniň halkara güni mynasybetli yglan eden "Sport — bagtyýarlygyň gözbaşy" atly döredijilik bäsleşiginiňem jemi jemlendi. Bu bäsleşikde Halkara žurnalistikasy fakultetiniň I ýyl talyby Muhammetmyrat Narmedow höweslendiriji baýraga mynasyp boldy. Biz hem öz gezegimizde talyplarymyzy mynasyp bolan baýraklary bilen tüýs ýürekden gutlap, olara geljekde hem döredijilik äleminde uly üstünlikleri arzuw edýäris.
Gurbanmyrat AŞYROW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.