Talyplarymyzyň nobatdaky üstünlikleri
2026-njy ýylyň 23—28-nji marty aralygynda Halkara ynsanperwer ylymlary we ösüş uniwersitetinde geçirilen VI Açyk halkara matematika olimpiadasy (OMOUS-2026) üstünlikli tamamlandy. Bäş günüň dowamynda geçirilen bu halkara bäsleşigine dünýäniň 9 döwletinden (Russiýa, Özbegistan, Täjigistan, Eýran, BAE, Germaniýa, Gresiýa, Wengriýa we Niderlandlar) gelen 600-den gowrak talyp gatnaşyp, özleriniň ukyp-başarnyklaryny görkezdiler.
Ýurdumyzyň adyndan çykyş eden türkmen talyplarynyň gazanan üstünliklerine Türkmenistanyň Daşary işler ministrliginiň Halkara gatnaşyklary institutynyň talyplary hem özleriniň mynasyp goşandyny goşdular. Institutymyzyň Halkara ykdysady gatnaşyklary kafedrasynyň uly mugallymy, fizika-matematika ylymlarynyň kandidaty, halypa mugallym Gaplaň Esenamanowyň ýolbaşçylygynda taýýarlanylan talyplar topary bu abraýly bäsleşige işjeň gatnaşyp, ýene-de bir gezek baýrakly orunlara mynasyp bolmagy başardylar.
Bäsleşigiň netijelerine görä, institutymyzyň Halkara ykdysady gatnaşyklary fakultetiniň talyby Goçmyrat Penjiýew I orna (altyn medala) mynasyp bolup, ýokary netije görkezdi. Şeýle-de bu fakultetiň talyplary Orazmyrat Sähetmyradow, Döwlet Kerimow II orna (kümüş medallara), Bägül Hudaýberdiýewa III orna (bürünç medala) mynasyp boldular. Bu görkezijiler institutymyzyň talyplarynyň diňe bir ynsanperwer däl, eýsem, takyk ylymlar ugrunda hem ýokary taýýarlygynyň bardygyny aýdyň subut edýär.
Talyp deň-duşlarymyzyň halkara derejesinde gazanan bu ajaýyp üstünlikleri bizi has-da buýsandyrýar. Ýeňijileri gazanan baýraklary bilen tüýs ýürekden gutlaýarys we olara ylym-bilim äleminde mundan beýläk hem uly üstünlikleriň ýar bolmagyny arzuw edýäris!
Selbi TÄŞLIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
4-nji ýyl talyby.