Talyplarymyz – ýeňiji
2024-nji ýylyň 15-nji maýynda beýik türkmen akyldary, nusgawy şahyrymyz Magtymguly Pyragynyň doglan gününiň 300 ýyllygy mynasybetli meýilleşdirilen çäreleriň çäginde Türkmen döwlet maliýe institutynyň guramagynda ýurdumyzyň ýokary okuw mekdepleriniň talyp ýaşlarynyň arasynda sanly ulgam arkaly «Magtymgulynyň döredijiligi – köňülleriň küýsegi» atly bilim bäsleşigi geçirildi.
Bäsleşige gatnaşan talyplar özlerine berlen bir sagadyň dowamynda ýurdumyzda akyldar şahyryň adyny ebedileşdirmek ugrunda alnyp barylýan işler, şahyryň ömri we döredijiligi, pähim-paýhasa ýugrulan ajaýyp şygyrlary, şeýle hem beýik söz ussadyna bagyşlanyp ýazylan goşgularyň, kitaplaryň atlary we awtorlary boýunça taýýarlanan test sowallaryna jogap berip, ukyp-başarnyklaryny açyp görkezdiler.
Türkmenistanyň Daşary işler ministrliginiň Halkara gatnaşyklary institutynyň talyplaryndan düzülen topar berlen soraglara gysga wagtyň içinde dürs jogap berip, tutanýerlilik we höwesjeňlik bilen bäsleşdiler. Emin agzalarynyň gelen netijelerine görä, Halkara žunalistikasy fakultetiniň talyplary Annaberdi Kaşaňow, Gurbansähet Gurbansähedow, Mätgurban Matkurbanow dagy I derejeli diploma, Aýşirin Döwletowa we Aýnur Hudaýbergenowa bolsa II derejeli diploma mynasyp boldular.
Selbi GULMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.