Talyp ýoldaşlarymyzyň nobatdaky üstünlikleri
Berkarar döwletimiziň Täze eýýamynyň Galkynyşy döwründe ýurdumyzyň iň gymmatly baýlygy bolan ynsan saglygyny gorap saklamak, ýaş nesliň geljekde beden we ruhy taýdan sagdyn, ruhubelent adamlar bolup ýetişmegini gazanmak möhüm döwlet wezipeleriniň biri bolup durýar. «Arkadag Serdarly bagtyýar ýaşlar» ýylymyzda ýerine ýetirilýän işler Watanymyzyň mundan beýläk-de gülläp ösmegine we ilatyň, şol sanda ýaşlarymyzyň bagtly durmuşyny hasam gowulandyrmaga gönükdirilendir.
Gahryman Arkadagymyzyň we Arkadagly Gahryman Serdarymyzyň öňe sürýän ýaşlar syýasaty bilen bilim almak, ýaşlaryň başarnyklaryny ösdürmek we hünär ukyplaryny durmuşa geçirmek üçin ähli şertler döredildi. Häzirki wagtda sport jemgyýetimiziň durmuşynyň möhüm bölegine öwrüldi.
Türkmen türgenleri bütindünýä sport hereketine işjeň gatnaşýarlar. Olaryň dürli derejede guralýan ýaryşlarda gazanýan üstünlikleri, medallary hormatly Prezidentimiziň sporty hem-de onuň ähli görnüşlerini ösdürmäge berýän ünsüniň we zehinlileri ýüze çykarmak, türgenleriň ussatlygyny ýokarlandyrmak üçin döredilýän şertleriň aýdyň netijesidir. Ine şeýle mümkinçilikleriň biri hem ýurdumyzda 2023-nji ýylyň 12-13-nji dekabry aralygynda «Karatedo» boýunça Ýokary okuw mekdepleriniň arasynda geçirilen ýaryşda hem biziň talyp ýoldaşlarymyz bolan, Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň II ýyl talyby Ýusup Garajaýew 60 kilogramda çykyş edip, birinji orny eýeläp, altyn medala, Halkara ykdysady gatnaşyklary fakultetiniň I ýyl talyby Rasul Atajanow (kata boýunça) birinji orny eýeläp, altyn medala, Halkara gatnaşyklary fakultetiniň III ýyl talyby Dawut Nazmyradow 75 kilogramda çykyş edip, üçinji orny eýeläp, bürünç medala, Halkara ykdysady gatnaşyklary fakultetiniň V ýyl talyby Eziz Arazow +84 kilogramda çykyş edip, üçinji orny eýeläp, bürünç medala mynasyp boldular.
Ýeri gelende bellesek, talyp türgenlerimiz diňe bir ýurdumyzda geçirilýän ýaryşlarda däl, eýsem halkara derejesinde geçirilýän bäsleşiklerde baýrakly orunlara mynasyp boldular. Şeýlelikde biz hem ýaş türgene geljekde mundan beýläk hem ýeňişleri gazanyp, ýurdumyzyň at-abraýyny has hem belent derejelere göterilmeginde rowana ýollarda üstünlikleriň ýar bolmagyny hem-de olara ýeneki ýurdumyzda we daşary ýurtlarda geçiriljek sport bäsleşiklerinde üstünlikleriň ýar bolmagyny arzuw edýäris!
Nursähet JOMARTOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby