Yhlasly zähmetiň miwesi
2024-nji ýylyň 27-29-njy apreli aralygynda Özbegistan Respublikasynyň Ürgenç şäherinde “Uzbekistan Open 2024” sport ýaryşy geçirildi. Oňa beýleki döwletler bilen bir hatarda ýurdumyzyň milli ýygyndy topary hem gatnaşdy.
Bu ýaryşda sportuň karate-do görnüşi boýunça Türkmenistanyň milli ýygyndy toparynyň türgeni, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 3-nji ýyl talyby Dawut Nazmyradow üstünlikli çykyş etdi. Dawut Nazmyradow 21 ýaşa çenli türgenleriň arasynda 75 kilograma çenli agram derejesinde çykyş edip, I orna mynasyp boldy we altyn medal gazandy. Ýeri gelende bellesek, D.Nazmyradowyň sport üstünlikleriniň sanawynda Türkiýede, Horwatiýada, Azerbaýjanda, Çilide we Italiýada geçirilen abraýly halkara ýaryşlardan getirilen kuboklardyr medallary bar.
Ýaş talyp deň-duşumyzy sport ulgamynda gazanan ynamly ýeňişleri bilen tüýs ýürekden gutlap, oňa geljekde okuwlarynda we sport äleminde uly üstünlikleriň ýar bolmagyny tüýs ýürekden arzuw edýäris!
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.