Strategik ylmy-barlag işlerine täze itergi
2023-nji ýylyň 10-njy maýynda Duşanbe şäherinde Türkmenistanyň Hormatly Prezidenti Serdar Berdimuhamedowyň Täjigistan Respublikasyna döwlet saparynyň barşynda türkmen we täjik hökümet wekiliýetleriniň gatnaşmaklarynda diplomatik, söwda, ykdysady, medeni, ylmy we ynsanperwer ugurlar boýunça ikitaraplaýyn hyzmatdaşlygyň ösdürilmegine gönükdirilen jemi 23 sany resmi resminama gol çekildi.
Gol çekilen resminamalaryň hatarynda Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň we Täjigistan Respublikasynyň Prezidentiniň ýanyndaky Strategik barlaglar merkeziniň arasynda özara düşünişmek hakynda Ähtnama hem bar.
Bu resminama strategik meseleler boýunça ylmy-barlag işlerinde hyzmatdaşlygy ösdürmäge, tejribe alyşmaga we netijeliligi ýokarlandyrmaga täze itergi bolup durýar.
Syýasy, ykdysady, taryhy-medeni we ynsanperwer barlaglary we sebit howpsuzlygy, ekologiýa, suw, energetika, halkara ulag kommunikasiýasy ýaly derwaýys meseleleri öwrenýän bu merkezleriň arasynda täze gol çekişilen Ähtnamanyň çäklerinde özara hereketleriň täsirli usullaryny we görnüşlerini ulanmak arkaly tejribe alşylar. Şeýle-de, taraplar özara gyzyklanma bildirilýän meseleler boýunça ylmy-barlag taslamalary we maksatnamalary durmuşa geçirmek maksady bilen, bilelikdäki seminarlary, konferensiýalary, forumlary, tegelek stol-duşuşyklaryny we beýleki çäreleri gurarlar.
Türkmenistanyň Daşary işler ministrliginiň
Halkara gatnaşyklary institutynyň
Strategik barlaglar boýunça ylmy merkezi