"ÝHHG ÇÄGINDE HOWPSUZLYGY, DURNUKLYLYGY WE DIALOGY BERKITMEKDE BITARAP DÖWLETLERIŇ ORNY" ATLY HALKARA MASLAHAT GEÇIRILDI
2023-nji ýylyň 16-njy maýynda paýtagtymyzyň “Ýyldyz” myhmanhanasynda Türkmenistan Mejlisi bilen Ýewropada Howpsuzlyk we Hyzmatdaşlyk Guramasynyň Parlament Assembleýasynyň hyzmatdaşlygynda "ÝHHG çäginde howpsuzlygy, durnuklylygy we dialogy berkitmekde bitarap döwletleriň orny" atly halkara maslahat geçirildi. Oňa dünýäniň dürli döwletleriniň, Ýewropada Howpsuzlyk we Hyzmatdaşlyk Guramasynyň (ÝHHG), Türkmenistan Mejlisiniň wekilleri, şeýle hem ýurdumyzyň ýokary okuw mekdepleriniň professor-mugallymlary we talyplary gatnaşdylar.
Halkara maslahatyň açylyş dabarasynda Türkmenistanyň Mejlisiniň Başlygy Dünýägözel Gulmanowa, ÝHHG-niň Parlament Assambleýasynyň Başlygy Margareta Sederfelt, şeýle hem ÝHHG-niň Türkmenistandaky wekilleri çykyş etdiler. Olar häzirki wagtda dünýäde gapma-garşylyklary çözmekde, howpsuzlygy, durnuklylygy berkitmekde we gepleşikleri üpjün etmekde bitarap döwletleriň ornunyň uludygyny aýratyn nygtadylar.
Maslahata gatnaşyjylar öz çykyşlarynda halkara gatnaşyklarynda Türkmenistan döwletimiz tarapyndan öňe sürlen “Dialog – parahatçylygyň kepili” atly täze filosofiýanyň orny barada içgin durup geçdiler. Şeýle-de, Türkmenistanyň hemişelik Bitaraplygynyň halkara hyzmatdaşlygynyň we sebitde hoşniýetli goňşuçylyk gatnaşyklarynyň ösmegine ep-esli itergi berendigi bellenildi.
Bu geçirilen halkara derejesindäki maslahata talyp ýaşlaryň gatnaşmagy hormatly Prezidentimiziň ýaşlar barada edýän aladalarynyň döwlet syýasatymyzyň ileri tutulýan ugurlarynyň biridiginiň aýdyň subutnamasydyr.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.