Sanly ulgam arkaly halkara ylmy-amaly maslahat geçirildi
2025-nji ýylyň 23-nji aprelinde Türkmen oba hojalyk institutynda “Oba hojalygynda tebigy baýlyklary rejeli peýdalanmak” atly sanly ulgam arkaly halkara ylmy-amaly maslahaty geçirildi. Maslahat öz işini üç sany bölümler boýunça alyp bardy.
Halkara ylmy-amaly maslahatda ýurdumyzyň ýokary okuw mekdepleriniň professor-mugallymlary, ylmy işgärleri, şeýle-de Russiýa Federasiýasynyň, Belarus Respublikasynyň, Azerbaýjan Respublikasynyň, Özbegistan Respublikasynyň, Moldowa Respublikasynyň, Pakistan Yslam Respublikasynyň, Gyrgyz Respublikasynyň alymlary çykyş etdiler. Ylmy–amaly maslahatyň “Suw gorlaryndan rejeli peýdalanmak” diýip atlandyrylan bölüminde Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň mugallymlary A.Omarowa we G.Hommadowa “Sebitde serhetüsti suwlardan peýdalanmagyň hukuk düzgünleşdirilişi” diýen tema boýunça çykyş etdiler.
Maslahatyň dowamynda ekologiýa abadançylygy, suw baýlyklaryndan rejeli peýdalanmak, maldarçylyk pudagynyň daşky gurşawa zyýanly täsirlerini peseltmek we başgada birnäçe meseleler boýunça hünärmenler çykyş etdiler hem-de tejribe alyşdylar.
Muhammet SÜLEÝMANOW,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary
kafedrasynyň mugallymy.