Russiýa Federasiýasynyň Daşary işler ministri Sergeý Wiktorowiç Lawrowyň ýolbaşçylygynda okuw sapagy guraldy
2025-nji ýylyň 25-nji iýunynda paýtagtymyzyň “Ýyldyz” myhmanhanasynda 24-nji iýunda başlanan resmi sapar bilen bagly ýurdumyza Russiýanyň Daşary işler ministri Sergeý Wiktorowiç Lawrowyň okuw sapagy geçirildi.
Bu möhüm sapar - Halkara parahatçylyk we ynanyşmak ýylynda, şeýle hem Türkmenistanyň hemişelik Bitaraplygynyň 30 ýyllygy we Birleşen Milletler Guramasynyň 80 ýyllygy bilen baglanyşdyrylýar.
Okuw sapagynyň dowamynda S.W. Lawrow deňhukukly gatnaşyklaryň mysaly bolan ýurtlarymyzyň ýolbaşçylary bilen halklaryň arasynda döredilen birek-birege hormat goýmak, düşünişmek we ýokary hyzmatdaşlyk barada aýtdy. Moskwa bilen Aşgabadyň arasyndaky strategiki hyzmatdaşlyk diňe bir iki döwlet üçin däl, eýsem tutuş Merkezi Aziýa we Hazar sebiti üçin hem peýdalydyr. Hemişelik Bitaraplygyň 30 ýyllyk ýubileýi, Garaşsyz Türkmenistanyň taryhynda, Hormatly Prezidentimiz Serdar Berdimuhamedowyň ýolbaşçylygynda Berkarar döwletiň Täze eýýamynyň Galkynyş döwründe möhüm bolup, parahatçylyk we döredijilik ýolunda ynamly hereket edýär.
Okuw sapagynyň ahyrynda gatnaşyjylar Hormatly myhmanymyza köp sanly möhüm meseleler boýunça sorag berdiler. Russiýa bilen Türkmenistanyň arasynda ylym, bilim, medeniýet we energetika ugurlaryndaky hyzmatdaşlygyň täze ugurlary barada gyzyklandylar. Şeýle hem, ýaşlaryň we geljekki diplomatlaryň rus-türkmen gatnaşyklaryny pugtalandyrmak we halkara gepleşiklerini ösdürmekdäki goşandyny ara alyp maslahatlaşdylar. Türkmenistanyň oňyn bitaraplygy düşünjesine, Bitaraplygyň dostlar toparynyň orny, şol sanda öňüni alyş diplomatiýasynyň mümkinçiliklerine uly üns berdiler.
Bagtygül AMANMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
gatnaşyklary fakultetiniň I ýyl talyby.