Rus kinosynyň we animasion filmleriniň hepdeligi tamamlandy
Medeniýet - halklary birleşdirýän köpri. Medeniýet – ähli adamzady, dünýä halklaryny aýdym – sazyň, kinonyň, poeziýanyň, prozanyň, umuman, sungatyň güýji bilen parahat durmuşa çagyrýan kuwwat. Munuň şeýledigini dünýäniň ençeme döwletlerinde geçirilýän ýurdumyzyň medeniýet hepdelikleri we biziň döwletimizde geçirilýän dünýäniň dürli döwletleriniň medeniýet günleri doly aýdyňlygy bilen tassyklaýar. Haçan-da özge milletleriň medeniýeti, däp-dessurlary bilen ýakyndan tanyşanyňda, şol halka bolan sylag – hormatyň, söýgiň has hem artýar.
2024-nji ýylyň 3-5-nji iýuny aralygynda Aşgabat şäherinde ýerleşýän «Aşgabat» kinoteatrynda we «Berkarar» söwda-dynç alyş merkeziniň kinoteatrynda rus dili güni mynasybetli geçirilen rus kinosy we animasion filmleriniň hepdeligi doganlyk türkmen – rus halklarynyň özara medeni gatnaşyklarynyň has-da pugtalandyrylmagyna goşant boldy. Bu hepdelige Aşgabat şäheriniň ýaşaýjylary we myhmanlary bilen birlikde Türkmenistanyň Daşary işler ministrliginiň Halkara gatnaşyklary institutynyň talyp ýaşlary hem gatnaşdylar. Hepdeligiň açylyşynda guralan ussatlyk sapaklary we çagalar üçin geçirilen dürli görnüşli bäsleşikler hepdelige aýratyn öwüşgin çaýdy. Bu ýerde guralan sergidäki köpöwüşginli surat eserlerini synlanyňda bolsa, Russiýa Federasiýanyň ajaýyp düzlüklerine, gür bagly tokaýlaryna, taýsyz tebigatyna gaýybana syýahat edeniňi duýman galýarsyň.
Kino sungatynyň muşdaklary bu hepdeligiň dowamynda «Я делаю шаг», «Три Богатыря и Пуп Земли», «Руслан и Людмила. Больше, чем сказка» ýaly rus kino sungatynyň ajaýyp eserlerine tomaşa etmäge mümkinçilik gazandylar.
Rus kinosynyň we animasion filmleriniň hepdeliginiň geçirilmegi türkmen halkynyň Milli Lideri Gahryman Arkadagymyzyň halkara gatnaşyklarynda öňe süren «Dialog – parahatçylygyň kepili» diýen taglymatynyň has-da rowaçlanýandygynyň aýdyň subutnamasy boldy.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.