«RAÝAT GORANYŞY WE ADATDAN DAŞARY ÝAGDAÝLARDA HEREKET ETMÄGE TAÝÝARLYK» BOÝUNÇA WAGYZ-NESIHAT DUŞUŞYGY GEÇIRILDI
2026-njy ýylyň 23-nji aprelinde Türkmenistanyň Daşary işler ministrliginiň Halkara gatnaşyklary institutynda “Raýat goranyşy we adatdan daşary ýagdaýlarda hereket etmäge taýýarlyk” boýunça wagyz-nesihat duşuşygy geçirildi. Oňa Aşgabat şäher Raýat goranyşy we halas ediş işleri müdirliginiň wekilleri hem-de Türkmenistanyň Daşary işler ministrliginiň Halkara gatnaşyklary institutynyň mugallymlary we talyplary gatnaşdylar.
Duşuşykda çykyş edenler Gahryman Arkadagymyzyň we hormatly Prezidentimiz Arkadagly Gahryman Serdarymyzyň sagdyn jemgyýeti kemala getirmekde durmuşa geçirilýän özgertmeleri, ýurdumyzda ýaşlar bilen bagly ýüze çykýan kanun bozulmalaryň öňüni almak boýunça alnyp barylýan işler, ýaş nesillerde watansöýüjilik, ahlaklylyk, mertlik, edermenlik, halallyk, zähmetsöýerlik ýaly ajaýyp häsiýetleri terbiýelemek, bedenterbiýe sport bilen meşgullanmak, ýaramaz, zyýanly endiklerden daşda durmak, ata-babalarymyzyň däp-dessurlaryna we milli ýörelgelerine eýermek, şeýle-de jemgyýetçilik ýerlerinde özlerini alyp barmagyň kada-kanunlary, ýurdumyzyň köçelerinde ýol hereketiniň düzgünlerini berjaý etmek, ýüze çykýan ýangyn howpsuzlygynyň öňüni almak, raýat goranyşa we adatdan daşary ýagdaýlara taýýarlygy boýunça düşündiriş işlerini güýçlendirmek barada giňişleýin aýdyp geçdiler.
Wagyz-nesihat duşuşygynyň ahyrynda oňa gatnaşanlar Gahryman Arkadagymyza, Arkadagly Gahryman Serdarymyza ylym-bilim ulgamynda işlemäge, okamaga döredip berýän mümkinçilikleri üçin alkyşly sözlerini beýan etdiler.
Berdimyrat PALTAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.