«PARAHATÇYLYGY ILERLETMEK: ÝURTLARYŇ ARASYNDA YNANYŞMAGY BERKITMEK BOÝUNÇA STRATEGIÝALARY DURMUŞA GEÇIRMEK» ATLY MASLAHAT
2024-nji ýylyň 11-nji aprelinde Türkmenistanyň Daşary işler ministrliginiň Halkara gatnaşyklary institutynda «Parahatçylygy ilerletmek: Ýurtlaryň arasynda ynanyşmagy berkitmek boýunça strategiýalary durmuşa geçirmek» atly maslahat geçirildi. Bu maslahata Türkmenistanyň Daşary işler ministrliginiň, Türkmenistanda ýerleşýän diplomatik wekilhanalaryň we halkara guramalaryň ýolbaşçylary, Türkmenistanyň Mejlisiniň, Türkmenistanyň Ylymlar Akademiýasynyň wekilleri, Türkmenistanyň köpçülikleýin habar beriş serişdeleriniň wekilleri, Türkmenistanyň ýokary okuw mekdepleriniň professor - mugallymlary we talyp ýaşlary gatnaşdylar. Maslahatda Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredowyň, Birleşen Milletler Guramasynyň Baş sekretarynyň ýörite wekili, BMG-niň Merkezi Aziýa üçin Öňüni alyş diplomatiýasy boýunça sebit merkeziniň ýolbaşçysy Kaha Imnadzeniň, Birleşen Milletler Guramasynyň Türkmenistandaky Hemişelik utgaşdyryjysy Dimitriý Şlapaçenkonyň, Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň ýolbaşçysy Jon MakGregoryň çykyşlary, Bütindünýä söwda guramasynyň Baş direktorynyň orunbasary Sýançen Çžanyň wideo aragatnaşyk arkaly çykyşy şeýle-de, Birleşen Milletler Guramasynyň Baş sekretarynyň orunbasary, BMG-niň Ýewropa ykdysady komissiýasynyň ýerine ýetiriji sekretary Tatýana Molçanyň, BMG-niň Baş sekretarynyň kömekçisi, BMG-niň Ösüş Maksatnamasynyň Ýewropa we GDA ýurtlary boýunça Sebitleýin edarasynyň müdiri Iwana Žiwkowiçiň, Birleşen Milletler Guramasynyň Azyk we oba hojalyk guramasynyň (FAO) Baş direktorynyň orunbasary we sebitleýin wekili Wiorel Gutsunuň, Birleşen Milletler Guramasynyň Ýewropada we Merkezi Aziýada durnukly ösüş maksatlaryny utgaşdyrmak boýunça sebiteýin direktory Gwi-Ýeop Sonyň wideoýüzlenmeleri diňlenildi.
Maslahatda çykyş edenler 2024-nji ýylyň 21-nji martynda Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisiniň dowamynda Türkmenistanyň başlangyjy esasynda biragyzdan kabul edilen «2025-nji ýyl – Halkara parahatçylyk we ynanyşmak ýyly» atly Kararnamanyň dünýäde parahatçylygy, howpsuzlygy berkitmekdäki aýratyn ähmiýetli orny we derwaýyslygy barada belläp geçdiler.
Maslahatyň işi «Jedelleri çözmekde we ynanyşmagy berkitmekde syýasy, ynsanperwer we diplomatik gurallar», «Parahatçylykly hereketleri goldamakda we ýardam bermekde halkara guramalarynyň orny», «Durnukly ösüşi we parahatçylygy goldamagyň ykdysady jähtleri» atly bölümlerde dowam edip, oňa gatnaşyjylar Türkmenistanyň halkara giňişlikde tutýan orny, Durnukly ösüş maksatlaryna ýetmekdäki alyp barýan işleri, derwaýys sebit meseleleri boýunça öňe sürýän daşary syýasy başlangyçlary barada nygtadylar. Ýeri gelende bellesek, şol başlangyçlar esasynda BMG-niň Baş Assambleýasynyň Kararnamasy bilen 2021-nji ýylyň «Halkara parahatçylyk we ynanyşmak ýyly», 2023-nji ýylyň «Parahatçylygyň kepili hökmünde dialogyň halkara ýyly», 12-nji dekabryň «Halkara Bitaraplyk güni» diýlip yglan edilmegi hem-de «2025-nji ýyl – Halkara parahatçylyk we ynanyşmak ýyly» atly Kararnamanyň hem kabul edilmegi Türkmenistanyň dünýäde parahatçylygy, howpsuzlygy ündeýändigine şaýatlyk edýär.
Maslahatyň ahyrynda Türkmenistanyň hormatly Prezidenti Serdar Berdimuhamedowa «Parahatçylygy ilerletmek: Ýurtlaryň arasynda ynanyşmagy berkitmek boýunça strategiýalary durmuşa geçirmek» atly maslahata gatnaşyjylaryň adyndan Ýüzlenme kabul edildi.
Suraý ÖWLIÝAGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň mugallymy.
Bu barada şu ýerde hem okap bilersiňiz: