OKUW SAPAKLARYNYŇ NOBATDAKY TAPGYRY BAŞLANDY
2025-nji ýylyň 26-njy fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda Suw diplomatiýasy ugry boýunça okuw sapaklarynyň 2024-2025-nji okuw ýylynyň II tapgyry başlandy. Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Merjen Gurbannazarowa alyp bardy. Bu okuw sapagyna institutyň ähli hünärlerinden düzülen 1-nji ýyl talyplary gatnaşdylar.
Sapagyň dowamynda uly mugallym M.Gurbannazarowa ýurdumyzda suw diplomatiýasy boýunça alnyp barylýan işler barada giňişleýin gürrüň berdi. Şeýle hem, hormatly Prezidentimiziň syýasatynyň möhüm ileri tutulýan ugurlarynyň biri daşky gurşawy goramakdan, tebigata aýawly garamakdan, geljekki nesiller üçin onuň baýlyklaryny gorap saklamakdan, türkmen halkynyň durmuşynyň oňaýly şertlerini döretmek üçin ýer-suw serişdelerinden oýlanyşykly peýdalanmakdan, Durnukly ösüş maksatlaryna ýetmekde dünýä jemgyýetçiliginiň tagallalaryny birleşdirmekde alnyp barylýan işler dogrusynda giňişleýin gürrüň berdi. Sapagyň ahyrynda talyplar özlerini gyzyklandyrýan sowallar dogrusynda mugallym bilen pikir alyşdylar.
Babamyrat GUWANJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.