OKUW SAPAGY GEÇIRILDI
2026-njy ýylyň 31-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Merkezi Aziýa + Ýewropa Bileleşigi sammitiniň söwda-ykdysady ähmiýeti» atly giňişleýin umumy okuw sapagy geçirildi. Bu okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň mugallymy Mährijemal Mämedowa alyp bardy. Okuw sapagynyň dowamynda Merkezi Aziýa döwletleri bilen Ýewropa Bileleşiginiň arasyndaky köptaraplaýyn hyzmatdaşlygyň täze strategik tapgyra gadam basandygy, aýratyn-da, Türkmenistanyň döwlet Baştutanynyň sammitde öňe süren möhüm başlangyçlarynyň ykdysady ähmiýeti barada giňişleýin düşündirildi.
Okuw sapagynda bellenilişi ýaly, häzirki wagtda Türkmenistan Ýewropa Bileleşigi bilen energetika çygryndaky dialogy täze derejä çykarmaga, hususan-da, «ýaşyl» energetika, wodorod energiýasy we elektrik energiýasyny Ýewropa ibermek ýaly taslamalara aýratyn üns berýär. Şeýle hem sebitde parahatçylygy we durnuklylygy saklamakda syýasy-diplomatik gatnaşyklaryň orny, Hazarüsti ugry boýunça täze ulag-kommunikasiýa geçelgelerini döretmek we Türkmenbaşy Halkara deňiz portunyň kuwwatyny halkara logistikasyna doly goşmak meseleleri seljerildi. Mundan başga-da, Ýewropanyň öňdebaryjy tehnologiýalaryny we maýa goýumlaryny ýurdumyzyň senagat pudagyna çekmek, haryt öndürijileri goldamagyň ýörite maksatnamalaryny taýýarlamak hem-de ynsanperwer ulgamda «ERASMUS+» ýaly bilim taslamalaryny giňeltmegiň ähmiýeti barada gürrüň edildi. Okuw sapagynyň ahyrynda talyplar halkara söwda gatnaşyklarynyň häzirki zaman meýilleri hem Türkmenistanyň alyp barýan ulag we energetika diplomatiýasy baradaky bilimlerini has-da artdyrdylar.
Ýakup ALTYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby.