OKUW SAPAGY GEÇIRILDI
2024-nji ýylyň 13-nji martynda Türkmenistanyň Daşary işler ministrliginiň Halkara gatnaşyklary institutynda Halkara ykdysady gatnaşyklary kafedrasynyň guramagynda okuw sapagy geçirildi. Okuw sapagyna institutyň talyplary we “Ýaş ykdysatçylar” ylmy gurnagynyň agzalary gatnaşdylar.
Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary kafedrasynyň dosenti Öwezmyrat Bäşimow alyp bardy. Okuw sapagynyň dowamynda gurnagyň başlygy Ö. Bäşimow halkara ykdysady gatnaşyklarynda ykdysadyýetiň möhüm bölegi bolan “Makroykdysadyýet” barada gürrüň berdi.
Sapagyň dowamynda Halkara ykdysady gatnaşyklary fakultetiniň II ýyl talyby Güljeren Ataýewa özüniň «Makroykdysadyýetiň döreýşi we manysy» atly ylmy temasy boýunça anyk edebiýat çeşmeleriniň maglumatlaryna salgylanyp çykyş etdi. Talyp öz deň-duşlary bilen saýlap alan ylmy temasy boýunça toplan maglumatlarynyň esasynda makroykdysadyýetiň döreýşi barada öz pikiri bilen paýlaşdy.
Soňra Halkara ykdysady gatnaşyklary fakultetiniň III ýyl talyby Agahan Agahanow «Aşgabat Halkara howa menziliniň işini logistikanyň nukdaýnazaryndan gurnamak» atly ylmy işiniň I tapgyry bilen sapaga gatnaşyjylary tanyşdyrdy. Şeýle-de ol öz çykyşynda logistikanyň döreýşi, onuň görnüşleri barada gatnaşyjylaryň dykgatyna ýetirdi. Çykyşyň soňunda özüniň ylmy işiniň II tapgyrynda öwrenilmeli soraglar boýunça gatnaşyjylar bilen pikir alyşdy.
Sapagyň ahyrynda talyplar özlerini gyzyklandyrýan birnäçe sowallar bilen mugallyma we talyba ýüzlenip, öz bilimlerini artdyrdylar.
Wepa KARAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň III ýyl talyby.