«Nowruz — ruhubelentligiň we ösüşleriň baýramy» atly DÖREDIJILIK FESTIWALYNYŇ DÜZGÜNNAMASY
Türkmenistanyň Daşary işler ministrliginiň Halkara gatnaşyklary institutynyň «Parahatçylyk medeniýeti» atly ÝUNESKO klubynyň guramagynda Bütindünýä şygryýet güni we ÝUNESKO-nyň Adamzadyň maddy däl medeni mirasynyň sanawyna girizilen Halkara Nowruz güni mynasybetli geçiriljek «Nowruz — ruhubelentligiň we ösüşleriň baýramy» atly
DÖREDIJILIK FESTIWALYNYŇ DÜZGÜNNAMASY
I. Umumy düzgünler
Bu düzgünnama Türkmenistanyň Daşary işler ministrliginiň Halkara gatnaşyklary instituty tarapyndan Bütindünýä şygryýet güni hem-de ÝUNESKO-nyň Adamzadyň maddy däl medeni mirasynyň sanawyna girizilen Halkara Nowruz güni mynasybetli geçiriljek «Nowruz — ruhubelentligiň we ösüşleriň baýramy» atly döredijilik festiwalyny (mundan beýläk – festiwal) guramagyň we geçirmegiň tertibini kesgitleýär hem-de festiwalyň dowamynda ýüze çykýan gatnaşyklary düzgünleşdirýär.
Düzgünnama «Ýaşlar barada döwlet syýasaty hakynda» Türkmenistanyň Kanunyna, «Bilim hakynda» Türkmenistanyň Kanunyna, Türkmenistanyň Konstitusiýasyna, şeýle hem Türkmenistanyň ýaşlar syýasaty we medeni ösüş boýunça kabul eden döwlet maksatnamalaryna laýyklykda işlenilip taýýarlanyldy.
Festiwal Türkmenistanyň Daşary işler ministrliginiň Halkara gatnaşyklary institutynyň «Parahatçylyk medeniýeti» atly ÝUNESKO kluby tarapyndan guralyp, Türkmenistanyň Medeniýet ministrligi hem-de Türkmenistanyň Magtymguly adyndaky Ýaşlar guramasynyň hemaýat bermeginde (gatnaşmagynda) geçirilýär.
Festiwala Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary, Halkara hukugy, Halkara ykdysady gatnaşyklary we Halkara žurnalistikasy fakultetleriniň talyplarynyň we magistrleriniň arasynda geçiriler.
Festiwalyň çäklerinde geçirilýän ähli çäreler ÝUNESKO-nyň parahatçylyk medeniýetini berkitmek boýunça maksatlaryna hem-de Nowruz baýramynyň adamzady birleşdiriji, dostlukly we ynsanperwer mazmunyna laýyk gelmelidir.
II. Festiwalyň maksady
Festiwalyň esasy maksady:
– 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» şygaryny hem-de ÝUNESKO-nyň Adamzadyň maddy däl medeni mirasynyň sanawyna girizilen Halkara Nowruz baýramynyň ähmiýetini giňden wagyz etmekden;
– ýaşlaryň arasynda parahatçylyk medeniýetini kemala getirmekden;
– zehinli we döredijilik ukyby ýokary bolan ýaşlary ýüze çykarmakdan we höweslendirmekden ybaratdyr.
III. Festiwalyň wezipeleri
Festiwalyň esasy wezipeleri aşakdakylardan ybaratdyr:
– ýaşlaryň döredijilik, çeper pikirlenme we medeni ukyp-başarnyklaryny ösdürmek;
– Nowruz baýramynyň taryhy, däp-dessurlary we ruhy gymmatlyklary barada bilim derejesini ýokarlandyrmak;
– parahatçylyk, ynanyşmak we medeni dialog ideýalaryny ýaş nesliň arasynda wagyz etmek;
– ýaşlary milli we halkara medeni mirasa hormat goýmak ruhunda terbiýelemek;
– ýaşlaryň jemgyýetçilik işjeňligini artdyrmak;
– döredijilik başlangyçlaryny, sport oýunlaryna bolan gyzyklanmany goldamak we höweslendirmek.
IV. Festiwalyň tapgyrlary we mazmuny
Festiwal üç esasy tapgyrdan ybaratdyr:
Birinji tapgyr – sergi tapgyry, onda talyplar we magistrler Nowruz baýramyny giňden belleýän belli bir döwletiň medeniýetini, milli lybaslaryny, el işlerini we tagamlaryny görkezýän sergi taýýarlaýar.
Ikinji tapgyr – döredijilik tapgyry, onda talyplar we magistrler tarapyndan taýýarlanan sahna çykyşlary, şygyr okaýyşlar, aýdym-sazly çykyşlar we folklor sahnalary görkeziler.
Üçünji tapgyr – milli sport oýunlary tapgyry, Nowruz baýramynyň aýrylmaz bölegi bolan milli gymmatlyklarymyzy dikeltmek we wagyz etmek maksady bilen, festiwalyň çäklerinde talyplaryň arasynda milli sport oýunlary (ýaglyga towusmak, ýüp çekdi, pille, düzzüm we ş.m.) boýunça ýaryşlar guralýar.
V. Festiwaly geçirmegiň tertibi
Festiwal 2026-njy ýylyň 18-nji martynda Türkmenistanyň Daşary işler ministrliginiň Halkara gatnaşyklary institutynda geçirilýär. Festiwala gatnaşýan fakultetleriň çykyşlaryna we taýýarlan sergilerine ýörite döredilen eminler topary tarapyndan baha berilýär. Festiwalyň jemleýji bölüminde işjeň gatnaşan talyplara we tapawutlanan fakultetlere Hormat hatlary we ýadygärlik sowgatlary gowşurylýar.
Festiwalyň netijeleri baradaky maglumatlar institutyň resmi web-saýtynda we köpçülikleýin habar beriş serişdelerinde giňden beýan edilýär.
Guramaçylyk topary:
Tel.:+99362071848
E-salgy:cultureofpeaceunesco@gmail.com