“New Year Fest 2025’’ atly festiwal geçirildi
2024-nji ýylyň 26-njy dekabrynda Türkmenistanyň Arkadag şäheriniň Aba Annaýew adyndaky Halkara atçylyk akademiýasynyň “Ahalteke atlary - parahatçylygyň ilçileri” atly ÝUNESKO klubynyň guramagynda “New Year Fest 2025’’ atly dünýä halklarynyň Täze ýyl baýramçylygyna taýýarlanan milli tagamlarynyň festiwaly geçirildi. Festiwala Türkmenistanyň Gahrymany, ÝUNESKO-nyň işleri barada Türkmenistanyň Milli toparynyň jogapkär sekretary Çynar Rüstemowa, şeýle hem ýurdumyzyň ýokary okuw mekdepleriniň ÝUNESKO klublarynyň mugallymlary we talyplary gatnaşdylar.
Festiwalda Halkara atçylyk akademiýasynyň talyplary dünýäniň dürli ýurtlarynyň, ýagny, Hindistanyň, Türkiýe Respublikasynyň, Hytaý Halk Respublikasynyň, Fransiýanyň, Özbegistanyň, Russiýa Federasiýasynyň, Amerikanyň Birleşen Ştatlarynyň, Germaniýa Federatiw Respublikasynyň we ýurdumyzyň milli tagamlary we medeniýetleri barada çykyş etdiler.
Festiwal örän şowhunly we çekeleşikli ýagdaýda geçdi. Festiwalyň ahyrynda eminler topary gowy çykyş eden talyplary baýraklar bilen sylagladylar.
Söýli ÝAZBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.