Meýletinçileriň okuw maslahatynyň nobatdaky sany
2021-nji ýylyň 1-nji dekabrynda Türkmenistanyň Daşary işler ministrliginiň Halkara gatnaşyklary institutynda “Türkmenistanda ýaşlar baradaky döwlet syýasatynyň 2021–2025-nji ýyllar üçin Döwlet maksatnamasyny” üstünlikli amala aşyrmak maksady bilen sanly ulgam arkaly yzygiderli alnyp barylýan okuw maslahatynyň nobatdaky sany geçirildi. Türkmenistanyň Bilim ministrliginiň, Türkmenistanyň Gyzyl Ýarymaý Milli jemgyýetiniň, Türkmenistanyň Sport we ýaşlar syýasaty ministrliginiň bilelikde guran bu okuw maslahatyna milli diplomatiýanyň ýokary mekdebiniň talyplary gatnaşdylar.
Bu okuw maslahatyny Myrat Garryýew adyndaky Türkmen döwlet lukmançylyk uniwersitetiniň wekili alyp bardy. Ol ýaşlaryň zyýanly endiklerden daşda durmaklaryny gazanmak, olaryň arasynda watansöýüjiligi wagyz etmek maksady bilen geçirilýän çäreleriň ähmiýeti we ýaş meýletinçileriň bu çärede eýeleýän orunlary barada täsirli çykyş etdi. Onuň çykyşy talyp ýaşlaryň gyzykly sowal-jogap alyşmalary bilen utgaşdy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň III ýyl talyby.