Metbugat giňişligine gaýybana syýahat
Netijeli we oňyn, parahatçylyk söýüjilik, deňhukuklylyk, özara düşünişmek ýaly ýörelgeler Türkmenistanyň daşary syýasatynyň düýp özenini düzýär. Gahryman Arkadagymyzyň «Dialog — parahatçylygyň kepili» atly ýörelgesi halklary, ýurtlary geljegiň röwşen menzillerinde bilelikde gadam urmaga çagyrýar. 2024-nji ýylyň 24 — 29-njy marty aralygynda daşary ýurtlaryň köpçülikleýin habar beriş serişdeleriniň wekilleriniň ýurdumyzda bolmagynyň çäklerinde «Türkmen topragy — gadymy medeniýetleriň merkezi» atly metbugat maslahatynyň geçirilmegi meýilleşdirilýär. Bu bolsa hyzmatdaş ýurtlar bilen gatnaşyklary ýygjamlaşdyrmagyň, köpçülikleýin habar beriş serişdeleriniň geljekki mümkinçiliklerini ara alyp maslahatlaşmagyň meýdançasy bolup çykyş eder. Bu maslahat diňe bir täze başlangyçlara badalga bolmak bilen çäklenmän, eýsem, milli medeniýetimiz, sungatymyz, Gündogaryň beýik akyldary Magtymguly Pyragynyň pähim-parasada ýugrulan goşgulary bilen tanyşmaga döredilen mümkinçilikdir. Gazetiň şu sanynda üstünlikli ösdürilýän hyzmatdaşlyk üçin ygtybarly giňişligi emele getirýän dünýäniň habarlar gulluklary, teleradio kompaniýalary we sanly platformalary baradaky maglumatlary okyjylara ýetirmegi makul bildik.
ITAR-TASS habarlar agentligi
Esaslandyryldy: 1904-nji ýylyň 1-nji sentýabry; Sankt-Peterburg, Russiýa Federasiýasy;
Baş direktory: Andreý Kondraşow;
Edara ediş merkezi:
Russiýa Federasiýasy, Moskwa;
Dili: 6 dilde hereket edýär;
Hyzmatdaşlyk: 112 ýurtdan 200-den gowrak habar beriş serişdeleri bilen;
ITAR-TASS habarlar agentligi döwlet gözegçiligindäki edara bolup, ol her gün alty dilde, takmynan, 3 müň habary köpçülige ýetirýär. Ol halkara Älem giňişliginde öz býurosy bolan dünýädäki ýeke-täk habar beriş serişdesidir. Onuň işi ýyl-ýyldan döwrebap tehnologiýalara, şol sanda internet we sosial ulgamlaryna uýgunlaşýar, kämilleşýär we hyzmatdaşlygynyň gerimi giňeýär. Maglumat giňişliginde 2021-nji ýylda Gahryman Arkadagymyzyň TASS habarlar agentliginiň baş direktorynyň birinji orunbasary Mihail Gusman bilen geçiren eksklýuziw interwýusy, 2022-nji ýylyň 9-njy awgustynda Türkmenistanda Russiýa Federasiýasynyň TASS habarlar agentliginiň ilkinji wekilhanasynyň açylmagy hem munuň aýdyň subutnamasydyr. 2024-nji ýylyň 1-nji sentýabrynda 120 ýyllygyny belleýän ITAR-TASS habarlar gullugy geljekde maglumat giňişligini has-da ösdürmegi meýilleşdirýär.
TRT Türk teleradio kompaniýasy
Esaslandyryldy: 1964-nji ýylyň 1-nji maýy;
Baş direktory: Mehmet Zahid Sobajy;
Edara ediş merkezi:
Türkiýe Respublikasy, Ankara;
Dili: 41 dilde hereket edýär;
Türkiýäniň sesine deňelýän, ýarym asyrlyk tejribä eýe bolan TRT Türkiýe döwlet teleradio kompaniýasy köp sanly tomaşaçylaryň ünsüni özünde jemleýän ilkinji döwlet teleýaýlymydyr.
Häzirki wagtda TRT Türkiýe döwlet teleradio kompaniýasy tarapyndan halkara hyzmatdaşlygyň kanuny esaslary kämilleşdirilýär. Tejribe alyşmaga we türkmen teleýaýlymlarynyň we radiožurnalistleriniň, kinorežissýorlarynyň işiniň kämilleşdirilmegine ýardam berýän dürli çärelerde gatnaşyklar has-da giňelýär. Ikitaraplaýyn bähbitli duşuşyklar geçirilýär, konstruktiw hyzmatdaşlyk alnyp barylýar. TRT öz ýaýlymlary arkaly türkmen halkynyň ykdysadyýeti, medeniýeti we däp-dessurlary barada ygtybarly maglumatlaryň ýaýramagyna ýardam edýär. Muňa mysal edip, 2024-nji ýylyň 11-nji martynda «TRT Haber» teleýaýlymynyň ýolbaşçysy Ahmet Görmeziň Gahryman Arkadagymyz bilen bolan söhbetdeşligini görkezmek bolar. Şeýle-de 2023-nji ýylda TRT teleýaýlymynyň şahamçasy bolan «TRT Avaz» teleýaýlymy tomaşaçylara Gadymy Merw we Köneürgenjiň taryhy we medeni ýadygärlikleri barada gysga dokumental filmi hödürledi.
«Mir» döwletara teleradio kompaniýasy
Esaslandyryldy:1992-nji ýyl;
Baş direktory: R.I.Batyrşin;
Edara ediş merkezi:
Russiýa Federasiýasy, Moskwa;
Şahamçalary: Mir, Mir 24, Radio «Mir»;
«Mir» döwletara teleradio kompaniýasy 1992-nji ýylda GDA agza döwletleriň döwlet baştutanlarynyň ylalaşygy bilen syýasy, ykdysady we ynsanperwer hyzmatdaşlygy, umumy maglumat giňişligini döretmek we halkara maglumat alyş-çalşygyny ösdürmek maksady bilen döredildi. «Mir» döwletara teleradio kompaniýasynyň internet portalynda Türkmenistanyň Arkadag şäherine «Arkadag «akylly» şäher» atly rubrikasynyň döredilmegi ýurdumyzyň dünýä ýurtlarynyň üns merkezindediginiň subutnamasydyr. Gahryman Arkadagymyzyň 2021-nji ýylda «Mir» döwletara teleradio kompaniýasyna beren interwýusynyň çäginde «Mir» nyşanly altyn medal bilen sylaglanmagy özara bähbitli gatnaşyklaryň mazmunyny has-da baýlaşdyrdy. Has takygy, Arkadag Serdarly bagtyýar ýaşlar ýylynda ýurdumyz tarapyndan «Mir 24» teleýaýlymyna 716 habar ugradylyp, habarlar giňişliginde beýan edildi.
Aziýa — Ýuwaş umman teleradiogepleşikler birleşigi (ABU)
Esaslandyryldy: 1964-nji ýyl;
Baş direktory: Ahmet Nadim;
Edara ediş merkezi:
Kuala-Lumpur, Malaýziýa;
Aziýa — Ýuwaş umman teleradiogepleşikler birleşigi halkara žurnalistleriň arasyndaky hyzmatdaşlyk üçin amatly platformalaryň biridir. Aziýa — Ýuwaş umman sebiti häzirki döwürde ählumumy ösüşiň we ilerlemegiň iň kuwwatly sebitleriniň biri hökmünde çykyş edýär. 2012-nji ýylyň aprel aýyndan bäri ABU-nyň doly hukukly agzasy bolan ýurdumyzda Aziýa — Ýuwaş umman teleradiogepleşikler birleşiginiň Baş Assambleýasynyň 55-nji mejlisiniň 2018-nji ýylda Aşgabatda geçirilmeginiň özi netijeli hyzmatdaşlygy alyp barmaga ýardam etdi.
Taýýarlan Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň talyby.