MERKEZI AZIÝADA DURNUKLY GELJEGE GARAÝYŞ
2024-nji ýylyň 27-30-njy oktýabry aralygynda Gazagystan Respublikasynyň Almaty şäherinde geçirilen Birleşen Milletler Guramasynyň Ösüş Maksatnamasynyň (UNDP) «Merkezi Aziýada zorlukly ekstremizmiň öňüni almak üçin durnukly jemgyýetleri ilerletmek» atly sebitleýin taslamasynyň çäginde ýokary derejeli duşuşyk geçirildi. Duşuşyk Merkezi Aziýa sebitindäki ýurtlaryň arasyndaky hyzmatdaşlygy pugtalandyrmak, durnukly ösüşiň gazanylmagyna gönükdirilen täze başlangyçlary we taslamalary ara alyp maslahatlaşmak üçin möhüm platforma boldy.
Duşuşygyň çäginde geçirilen sergä Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 4-nji ýyl talyby Resul Gylyjow hem gatnaşyp, ekologiýa boýunça «Geljegiň eko-öýi: gün güýji we ýel energiýasy» atly taslamasyny hödürledi. Bu taslama daşky gurşawy goramak we energiýa netijeliligini ýokarlandyrmak maksady bilen taýýarlanyp, alternatiw energiýa çeşmeleriniň durmuşa ornaşdyrylmagynyň möhümdigini görkezýär. Taslamada gün we ýel energiýasynyň ulanylyşy arkaly durnukly ýaşaýyş jaýlarynyň gurluşygy, energiýany tygşytlamak we tebigy serişdeleri gorap saklamak boýunça mümkinçilikler beýan edilýär.
Maslahatda sebitleýin hyzmatdaşlygyň ähmiýeti, täze tehnologiýalaryň we innowasiýalaryň ornaşdyrylmagynda döwletleriň bilelikdäki tagallalaryny güýçlendirmek, şeýle-de ýaşlaryň durnukly ösüş maksatlaryna ýetmekde tutýan orny aýratyn nygtaldy.
Şeýle çäreleriň geçirilmegi diňe bir Merkezi Aziýa üçin däl-de, bütin dünýäde durnukly ösüşi üpjün etmek, parahatçylygy goramak we zorlukly ekstremizmiň öňüni almak ýaly möhüm meseleleriň çözülmegine itergi berýär.
Agahan AGAHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 4-nji ýyl talyby.