Merkezi Aziýa ýurtlarynyň özara gatnaşyklarynyň täsirli nokatlary Nur-Sultanda maslahatlaşyldy
2022-nji ýylyň 29-30-njy iýunynda Gazagystan Respublikasynyň paýtagty - Nur-Sultan şäherinde “Täze geosyýasy şertlerde Merkezi Aziýa hyzmatdaşlygy: wehimler we mümkinçilikler” atly halkara konferensiýa geçirildi. Bu konferensiýa Gazagystan Respublikasynyň Prezidentiniň ýanyndaky Strategik barlaglar insitituty tarapyndan guraldy.
Täze geosyýasy-geoykdysady wehimler we dünýä syýasatynyň çylşyrymly şertlerinde ýurtlaryň hyzmatdaşlygyny mundan beýläk ösdürmegiň derwaýys meselelerine gönükdirilen bu Maslahata Gazagystan, Gyrgyzystan, Täjigistan, Özbegistan we Türkmenistan döwletleriniň Strategik barlaglar boýunça düzümleriniň bilermenleri, syýasaty öwrenijiler hem-de köpçülikleýin habar beriş serişdeleriniň wekilleri gatnaşdy.
Gün tertibine laýyklykda, maslahatda halkara söwdany, ulag-kommunikasiýalaryny ösdürmekde baglaşdyrýan nokatlary kesgitlemek, azyk howpsuzlygyny üpjün etmek, şeýle hem global wehimleri çözmäge umumy çemeleşme işläp düzmek boýunça pikirler alşyldy.
Maslahatda sebitiň azyk howpsuzlygyny üpjün etmegiň we ulag kommunikasiýalaryny ösdürmegiň umumy meselelerini çözmek boýunça täzeçe ugurlar gatnaşyjylar tarapyndan aýdyňlaşdyryldy.
Halklaryň medeniýetini birek-biregiň hasabyna baýlaşdyrmagyň, Merkezi Aziýanyň dünýädäki pozitiw ornuny tanatmagyň zerurlygy göz öňünde tutulyp, sebitde ýaşaýan raýatlaryň we daşary ýurtly syýahatçylaryň bir ýurtdan beýlekä päsgelçiliksiz geçmekleri we gezelenç etmekleri üçin oňyn şertleri döretmegiň usullary barada teklipler ýaňlandy.
Şeýle-de konferensiýada Merkezi Aziýadaky ýurtlaryň suwy tygşytlamak, daşky gurşawy gorap saklamak, oba hojalyk kooperasiýasyny ýaýbaňlandyrmak, ylymda we medeniýetde hyzmatdaşlygy berkitmek babatda aýdylan pikirler bilermenler tarapyndan oňlanyldy.
Mundan başga-da, maslahatda halkara terrorçylygyna, bikanun migrasiýa we garyplyga garşy göreşmegiň hem-de howanyň üýtgemegine garşy bilelikde iş alyp barmagyň zerurlygy nygtaldy.
Maslahata “off-line” tertipde, ýagny janly gatnaşan — Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň ylmy işgäri D.Mämmedow sebitde ulag-üstaşyr geçelgeleriniň gelejegi barada çykyş etdi. Ol ýurdumyzyň ulag strategiýasyny gatnaşyjylara giňişleýin düşündirdi. Ýurdumyzda demir ýollaryny, awtomobil ýollaryny, howa we deňiz-derýa ugurlaryny we ýük daşamak bilen bagly infrastrukturany ösdürmek boýunça täze durmuşa geçirilen bähbitli taslamalary ýygnananlaryň dykgatyna ýetirdi. Şeýle-de türkmen wekili çykyşynda dürli halkara forumlarynda we gepleşiklerinde Türkmenistan tarapyndan teklip edilen ykdysady taýdan bähbitli taslamalara we gelejegi uly bolan pikirlere gatnaşyjylaryň ünsüni çekdi.
Döwletmyrat MÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Strategik barlaglar boýunça ylmy merkeziniň
ylmy işgäri
Şeýle hem bu barada şu ýerden okap bilersiňiz!
https://el.kz/ru/news/obshestvo/eksperty_tsa_predlagayut_sozdat_platformu_po_kooperatsii_v_sfere_vodnoy_politiki_/
http://sszi.kz/20220630
https://isrs.uz/ru/yangiliklar/podhody-uzbekistana-po-rassireniu-vzaimovygodnogo-sotrudnicestva-v-centralnoj-azii-v-centre-vnimania-ucastnikov-mezdunarodnoj-konferencii-v-kazahstane