Merkezi Aziýa ýurtlarynyň Daşary işler ministrleriniň orunbasarlarynyň her ýylky on dördünji duşuşygy geçirildi
2024-nji ýylyň 26-njy noýabrynda Türkmenistanyň Daşary işler ministriniň orunbasary Mähri Bäşimowanyň ýolbaşçylygyndaky Türkmenistanyň wekiliýeti Merkezi Aziýa ýurtlarynyň Daşary işler ministrleriniň orunbasarlarynyň her ýylky on dördünji duşuşygyna gatnaşdy.
Duşuşyk Özbegistanyň Hökümetiniň goldawy bilen BMG-niň Merkezi Aziýa üçin öňüni alyş diplomatiýasy boýunça sebit merkezi (UNRCCA) tarapyndan guraldy.
Duşuşyga Merkezi Aziýa ýurtlarynyň daşary işler ministrleriniň orunbasarlary, BMG-niň Owganystana kömek bermek boýunça missiýasynyň, BMG-niň Syýasy we parahatçylyk gurluşyk meseleleri boýunça departamentiniň, şeýle hem UNRCCA wekilleri gatnaşdylar.
Duşuşygyň dowamynda taraplar sebit we halkara gün tertibiniň möhüm meselelerini ara alyp maslahatlaşdylar we Merkezi Aziýada sebit hyzmatdaşlygynyň ösüşiniň geljegine garadylar.
Şeýle hem Merkezi Aziýada parahatçylyga we howpsuzlyga täsir edýän wakalar we tendensiýalar barada pikir alyşyldy. Şu nukdaýnazardan, şeýle duşuşyklaryň ýüze çykýan töwekgelçiliklere öz wagtynda jogap bermekde we bilelikdäki hereketleri täze kynçylyklara uýgunlaşdyrmakda aýratyn orun eýeleýändigi nygtaldy.
Duşuşygy Öňüni alyş diplomatiýasynyň akademiýasynyň häzirki gatnaşyjylary öz çykyşlary bilen jemlediler. Şeýle hem, günüň 2-nji ýarymynda şol akafemiýanyň häzirki gatnaşyjylary öz medeniýetini beýan edýän medeni çykyşlaryny görkezdiler. Türkmenistanyň wekilýeti Magtymguly Pyragynyň “Türkmeniň” atly goşgusyny türkmen, özbek, gazak, täjik, gyrgyz we rus dillerinde ýerine ýetirdiler. Şol bir wagtda, olar dutar we gopuz gurallarynda saz çaldylar. Medeni çäre Küştdepdi tansy bilen şowhunly jemlendi.
Abdykerim ANNAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.