![Medeniýet — ynsan köňlüniň nury surady](https://iirmfa.edu.tm/images/posts/12_1719226583.webp)
24/06/2024
382
Medeniýet — ynsan köňlüniň nury
Medeniýet we sungat işgärleriniň hem-de Magtymguly Pyragynyň şygryýet güni mynasybetli her ýyl geçirilmegi asylly däbe öwrülen Medeniýet hepdeligi halkymyzyň ruhy mirasyny gorap saklamakda, öwrenmekde hem-de dünýä ýaýmakda möhüm ähmiýete eýedir. 2024-nji ýylyň 22-nji iýunynda sebitiň «akylly» megataslamasy bolan Arkadag şäherinde ilkinji gezek Medeniýet hepdeligine badalga berilmegi halkymyzyň watançylyk ruhuny ýokary götermekde, taryhy ýörelgelerimizi dabaralandyrmakda möhüm başlangyç boldy. 27-nji iýuna çenli dowam etjek bu medeni forumyň açylyş dabarasy Arkadag şäheriniň Aman Gulmämmedow adyndaky döwlet drama teatrynda geçirildi.
Taryhdan mälim bolşy ýaly, merdana pederlerimiz gowgaly söweşlerde ar-namysa ýugrulan aýdymdyr sazlardan ruhlanyp, duşman üstüne şir dek topulypdyrlar, bagşylaryň watançylyk hakynda aýdýan aýdymlarynyň sözlerinden many alypdyrlar. Diýmek, milli medeniýetiň, aýdym-saz sungatynyň watançylyk ähmiýeti örän güýçlüdir. Arkadagly Gahryman Serdarymyzyň parasatly baştutanlygynda Arkadag şäherinde giňden dabaralandyrylýan Medeniýet hepdeligi hem halkymyzyň şöhratly taryhyny, tomaşaly toýlarymyzyň belent dabarasyny äleme doldurýar. Gahryman Arkadagymyzyň başlangyjy bilen döredilen bu meşhur medeni forum ýurdumyzda 12-nji gezek geçirilýär.
Döwlet Baştutanymyz Medeniýet hepdeligine gatnaşyjylara iberen Gutlagynda şeýle belleýär: «Arkadag şäherinde geçirilýän
Medeniýet hepdeliginiň hem türkmen medeniýetini we sungatyny has-da kämilleşdirmek, onuň köpöwüşginliligini giňden açyp görkezmek babatda baý mazmunly medeni çärä öwrüljekdigine berk ynanýaryn». Şunuň bilen baglylykda, Köpetdagyň ajaýyp dag eteginde ýerleşýän bu «akylly» şäherinde şeýle uly tutumlar üçin ähli şertleriň döredilendigini buýsançly bellemek gerek. Açylandan bäri geçen bir ýyla ýakyn wagtyň içinde Arkadag şäheri sungatyň, döredijiligiň joş urýan mekanyna öwrüldi. Täze şäherde halkara sungat we medeni çäreler, döredijilik bäsleşikleri yzygiderli geçirilýär. Bu şäherde görseň gözüňi dokundyryp duran kaşaň teatryň, döwlet sirkiniň, muzeýiň, kitaphananyň, sungat mekdepleriniň bolmagy medeni ösüşleri ilerletmäge giň mümkinçilik berýär.
Medeniýet hepdeliginiň dowamynda guraljak medeni çäreler hakynda durlup geçilse, 2024-nji ýylyň 22-nji iýunynda Arkadag şäheriniň Aman Gulmämmedow adyndaky döwlet drama teatrynyň döredijilik topary tarapyndan sahnalaşdyrylan «Älem nury» atly sahna eseriniň ilkinji görkezilişiniň bolandygyny nygtamalydyrys. Akyldar şahyrymyz Magtymguly Pyragynyň ömrüne we döredijiligine bagyşlanan bu sahna eseri tomaşaçylar köpçüligi tarapyndan uly gyzyklanma bilen garşylandy. Täze sahna eserinde dünýä döräli bäri dowam edip gelýän haýyr bilen şeriň göreşi beýan edilýär. Tomaşanyň başynda Jebrut äleminiň nury zemine inýär. Ol nur adamzady baky bagta ýetirip biljek gizlin syryň açarydyr. Hut şu wakalaryň esasynda hem Magtymguly Pyragynyň ruhy-ahlak, watançylyk hem-de döwletlilik garaýyşlary öz beýanyny tapýar. Türkmenistanyň halk ýazyjysy Gowşutgeldi Daňatarowyň we Abdylazym Rejepowyň beýik söz ussadymyzyň şygyrlarynyň we halk rowaýatlarynyň esasynda döreden sahna eseri Bagtyýar Abaýewiň režissýorlyk etmeginde tomaşaçylara ýetirildi. Şeýle baý mazmunly çykyşlara Medeniýet hepdeliginiň tutuş dowamynda giň orun berilýär. Mundan başga-da, ýaşlaryň arasynda yglan edilen «Pähim-paýhas ummany Magtymguly Pyragy» atly bäsleşigiň ýeňijilerini sylaglamak dabarasy, Medeniýet we sungat işgärleriniň hem-de Magtymguly Pyragynyň şygryýet güni mynasybetli baýramçylyk konsertidir döredijilik agşamy, Arkadag şäheriniň açylmagynyň 1 ýyllygy mynasybetli aýdym-sazly baýramçylyk dabaralary medeni forumyň çäreleri bilen utgaşdyrylar.
Medeniýete sarpa — Watana sarpa. Çünki ähli zadyň, ähli ulgamyň, ähli belentlikleriň sakasynda medeniýet bar. Diýmek, Arkadag şäherinde geçirilýän Medeniýet hepdeligi hem medeniýeti, sungaty, sözi ýene bir ýola has belentden sarpalamaga döredilen mümkinçilikdir. Hepdeligiň çäklerinde opera, aýdym-saz, kino we teatr, şekillendiriş, amaly-haşam sungaty, edebiýat, halk döredijiligi ýaly häzirki zaman türkmen medeniýetiniň ähli ugurlaryny özünde jemleýän çäreleriň meýilleşdirilmegi munuň şeýlediginiň aýdyň beýanydyr.
Medeniýet hepdeligi dowam edýär. Maksatnamalaýyn çäreler mazmuna baýlygy bilen tapawutlanýar. Her ýyl bolşy ýaly, bu gezekki medeni forum hem jemgyýetimiziň sungata bolan gyzyklanmasynyň artýandygyny, döredijilik başlangyçlarynyň rowaçlanýandygyny aýdyň görkezýär. Ýürekleri birleşdirip, duýgulary sözleşdirýän baýram — Medeniýet hepdeligi, sözüň doly manysynda, medeniýetiň, sungatyň baýramydyr. Goý, Gahryman Arkadagymyzyň hem-de Arkadagly Gahryman Serdarymyzyň parasatly baştutanlygynda türkmen medeniýetiniň at-owazasy has-da belende galsyn!
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.
Soňky täzelikler
![Ene sarpasy — milletiň mertebesi surady](https://iirmfa.edu.tm/images/posts/33iIrHJMtVPrCX7lhOiYDfBZ5R0VdIN4w4qasvD5hKcnXREJa9bLuMzsxR7P_1725444992.webp)
04/09/2024
Ene sarpasy — milletiň mertebesi![Terbiýe söz bilen, görelde göz bilen surady](https://iirmfa.edu.tm/images/posts/kkCarTsco2VzgpP8ZTLn6rdUSTK0pDsX0YsyyFp2DMbAeRG0RFcJexCJzw0v_1725170760.webp)
01/09/2024
Terbiýe söz bilen, görelde göz bilen