Magtymguly Pyragynyň goşgular ýygyndysynyň gyrgyz diline terjime edilmegine bagyşlanan tanyşdyrylyş dabarasy
2024-nji ýylyň 17-nji oktýabrynda Türkmenistanyň Daşary işler ministrliginiň Halkara gatnaşyklary institutynda Gündogaryň beýik akyldary, dana şahyr Magtymguly Pyragynyň goşgular ýygyndysynyň gyrgyz diline terjime edilmegine bagyşlanan tanyşdyrylyş dabarasy geçirildi. Tanyşdyrylyş dabarasynyň çäginde Merkezi Aziýa döwletleriniň milli şekillendiriş we amaly-haşam sungatynyň eserleriniň, Magtymguly Pyragynyň ömri we döredijiligine bagyşlanan kitaplaryň sergisi guraldy. Doganlyk halklaryň gymmatly medeni mirasyny şöhlelendirýän bu sergi dabara gatnaşyjylarda ýakymly täsir galdyrdy.
Dabaranyň dowamynda Gyrgyz Respublikasynyň Türkmenistandaky Adatdan daşary we Doly ygtyýarly ilçisi Azizbek Madmarow, Türkmenistanyň Daşary işler ministrliginiň Halkara gatnaşyklary institutynyň ylmy işler boýunça prorektory Begenç Mätliýew, Türkmenistanyň Ylymlar akademiýasynyň Dil, edebiýat we milli golýazmalar institutynyň tekstologiýa we edebi miras bölüminiň esasy ylmy işgäri Täzegül Hapyzowa, Türkmen döwlet binagärlik-gurluşyk institutynyň uly mugallymy Amangeldi Orazow, şeýle-de wideoaragatnaşyk ulgamy arkaly Gyrgyz Respublikasynyň Medeniýet, maglumat sport we ýaşlar syýasaty ministri Altynbek Maksutow, Gyrgyz Respublikasynyň Daşary işler ministrliginiň Kazy Dikambaýew adyndaky Diplomatik akademiýasynyň ylmy işler boýunça prorektory Zaýnidin Kurmanow, Gyrgyz Respublikasynyň Çingiz Aýtmatow adyndaky Milli akademiýasynyň Dil we edebiýat institutynyň direktory Abdyldadjan Akmataliýew, Gyrgyz Respublikasynyň halk artisti, kompozitor Tugolbaý Kazakow dagy çykyş etdiler. Çykyşlarda «Pähim-paýhas ummany Magtymguly Pyragy» şygary astynda geçýän 2024-nji ýylda beýik söz ussady Magtymguly Pyragynyň goşgular ýygyndysynyň gyrgyz diline terjime edilmeginiň ähmiýeti dogrusynda giňişleýin gürrüň edildi.
Dabarada çykyş edenler dünýäniň ençeme ýurtlary bilen bir hatarda Gyrgyzystan Respublikasynda hem nusgawy şahyryň döredijiligine uly hormat goýulýandygyny, akyldar şahyryň goşgular ýygyndysynyň gyrgyz diline terjime edilmeginiň iki doganlyk halklaryň arasyndaky medeni-ynsanperwer gatnaşyklaryň yzygiderli ösdürilýändiginiň aýdyň subutnamasy bolandygyny uly buýsanç bilen bellediler.
Bu dabara türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň taýsyz tagallalary netijesinde Gündogaryň beýik akyldary, söz ussady, filosof Magtymguly Pyragynyň eserleriniň at-abraýynyň dünýä dolandygynyň aýdyň subutnamasy boldy.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.
Bu barada şu ýerde hem okap bilersiňiz: