MAGISTRANTLARYŇ ARASYNDA BÄSLEŞIK GEÇIRILDI
2023-nji ýylyň 15-njy maýynda Türkmenistanyň Daşary işler ministrliginiň Halkara gatnaşyklary institutynda “Ýaş alymlar geňeşiniň” gurnamagynda her bir adamyň hukuklarynyň we azatlyklarynyň ygtybarly esaslaryny döretmeklige, halkymyzyň parahat durmuşyny we milli jebisligini üpjün etmeklige hem-de halk häkimiýetine, kanunlaryň mizemezligine daýanýan Esasy Kanunymyz – Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli Bitarap Türkmenistanyň daşary syýasy ugrunyň 2022-2028-nji ýyllar üçin konsepsiýasynyň “Ynsanperwer we medeni ugurlarda hyzmatdaşlyk. Adam hukuklary” ugruna laýyklykda magistrantlaryň arasynda bäsleşik geçirildi. Bäsleşigiň maksady Türkmenistanyň Esasy Kanuny we ondan gelip çykýan milli kanunçylygymyz boýunça ýaşlaryň bilimlerini artdyrmaga gönükdirilendir.
Bäsleşige institutyň Halkara hususy hukugy we Halkara jemagat hukugy ugrunyň magistrantlaryndan düzülen toparlar gatnaşdylar. Jemi 3 tapgyrdan ybarat bolan bu bäsleşikde “Hökmürowanlyk” diýlip atlandyrylan Halkara jemagat hukugy ugrunyň magistrlaryndan düzülen topar ýeňiş gazandy. Ýeňijiler we bäsleşige gatnaşyjylar Türkmenistanyň Daşary işler ministrliginiň Halkara gatnaşyklary institutynyň “Ýaş alymlar geňeşiniň” degişli hormat hatlary we sowgatlary bilen sylaglandylar.
Şeýle bäsleşikleriň geçirilmegi ýaşlaryň arasynda Konstitusiýa boýunça bilimliligini artdyrmakda, olaryň arasynda agzybirligi, dost-doganlygy berkitmekde örän uly ähmiýete eýedir.
Gülsenem Hommadowa,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
Halkara hususy
hukugy ugrynyň magistranty.