Maddy hem-de medeni mirasa goýulýan sarpanyň aýdyň nyşany
Berkarar döwletimiziň täze eýýamynyň Galkynyşy döwründe hormatly Prezidentimiz tarapyndan Döwlet syýasaty üstünlikli durmuşa geçirilýär. Taryhy gymmatlyklarymyzy goramak we ony geljekki nesillerimize ýetirmek wajyp wezipeleriň biridir. Bu ugurda Garaşsyz, baky Bitarap Türkmenistan döwletimiz hem BMG-niň bilim, ylym we medeniýet boýunça ýöriteleşdirilen edarasy bolan ÝUNESKO bilen hyzmatdaşlygyna eýýäm laýyk otuz ýyl dolýar. Häzirki wagtda ÝUNESKO-nyň maddy we medeni gymmatlyklarynyň sanawyna türkmen halkyna mahsus gymmatlyklaryň onlarçasy girizildi. Bu bolsa taryhy ýadygärliklerimize goýulýan sarpanyň aýdyň ýüze çykmasydyr.
Ýaňy-ýakynda hem sebitiň täze merjeni bolan Arkadag şäherinde täze muzeý açylyp, ulanylmaga berildi. Häzirki wagtda şeýle döwrebap muzeýleriň ulanylmaga berilmegi, şeýle ýerlere ýaşlaryň gezelenç etmegi, taryh bilen ýüzbe-ýüz bolup, içgin öwrenmäge giň mümkinçilik berýär. Muzeý gymmatlyklaryny saklamak, dikeltmek we taýýarlamak ugrundan işleýän hünärmenleriň aýtmagyna görä, muzeýiň gorlary ýurdumyzyň taryhy ösüşiniň ähli döwürlerini görkezer we olaryň hatarynda gadymyýetiň, bürünç we demir asyrlarynyň, neolit we eneolit eýýamlarynyň we beýleki döwürleriň, belli asyrlaryň ýadygärlikleri bar. Ýurdumyzyň muzeý gaznalarynyň gymmatlyklaryny baýlaşdyrmak hormatly Prezidentimiz Serdar Berdimuhamedowyň Türkmenistanyň taryhy we medeni ýadygärliklerini saklamak, öwrenmek hem-de giňden wagyz etmek meselelerine möhüm ähmiýet berýändiginiň aýdyň netijesidir.
Hormatly Prezidentimiziň belleýşi ýaly, milli medeniýetiň işini kämilleşdirmek, milli mirasymyzyň gymmatyklaryny düýpli öwrenmek, gorap saklamak, dünýäde wagyz etmek boýunça işler geljekde hem dowam etdiriler, taryhy we medeni ýadygärliklerimizi, taryhy-medeni mirasyň desgalaryny abat saklamak hem-de öwrenmek boýunça zerur çäreler görler. Mundan başga-da, ÝUNESKO-nyň Adamzadyň maddy däl medeni mirasyň desgalaryny abat saklamak hem-de öwrenmek boýunça işler geçiriler. “Milli taryhy-medeni mirasyň obýektlerini aýap saklamagyň, goramagyň, öwrenmegiň hem-de olara syýahatçylary çekmegiň 2022-2028-nji ýyllar üçin Döwlet maksatnamasy” bu ugurda netijeli işleriň alnyp barylmagyna ýardam eder.
Bu maksatnamanyň durmuşa geçirilmegi türkmen halkynyň gadymy taryhynyň, baý medeni mirasynyň, milli gymmatlyklaryny gorap saklamaga we geljekki nesillere ýetirmäge hem-de dünýä derejesinde dabaralandyrmaga giňden ýardam eder.
Aýgözel AŞIROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň
öwreniji mugallymy.