TÜRKMENISTANYŇ KONSTITUSIÝASYNYŇ WE DÖWLET BAÝDAGYNYŇ GÜNÜNE BAGYŞLANAN MASLAHAT
2023-nji ýylyň 15-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasy we Döwlet baýdagynyň güni mynasybetli duşuşyk maslahaty geçirildi. Maslahatda Türkmenistanyň Içeri işler ministrliginiň, Türkmenistanyň Adalat ministrliginiň, Türkmenistanyň Ýokary kazyýetiniň, Türkmenistanyň Migrasiýa gullugynyň wekilleri, institutymyzyň mugallymlary we talyplary gatnaşdylar.
Maslahatyñ dowamynda Esasy Kanunymyz bolan Konstitusiýamyzyň döwleti dolandyrmakda, adamlaryň we raýatlaryň, hukuklaryny we azatlyklaryny goramakda, döwletiň hem-de adamlaryň gatnaşyklaryny ýola goýmakdaky wajyp orny barada bellenip geçildi. Şeýle-de ýurdumyzyň Esasy Kanuny döwlet gurluşynyň milli we dünýä tejribesini, umumadamzat gymmatlyklarynyň ýörelgelerini özünde jemläp, öz esasy aýratynlyklaryny saklamak bilen bir hatarda, çeýe hukuk guraly bolup durýar, döwrüň talaplaryny hem-de halkara hukugynyň umumy ykrar edilen kadalaryny hasaba almak bilen yzygiderli kämilleşdirilýänligi barada hem nygtalyp geçildi.
Maslahatyň soňunda çykyş edenler jemgyýetçilik durmuşynyň ähli ugurlarynda kanunlaryň hökmürowanlygy, döwletiň kanunçykaryjy edarasy tarapyndan döwletiň adyndan kabul edilýän kanunlaryň adalatlylyk, ynsanperwerlik, halk häkimiýetliligi, deňhukuklylyk, ynsanyň tebigy hem mizemez hukuklarynyň eldegrilmesizligi ýaly umumy ykrar edilen hukuk ýörelgelerini üpjün edýän hormatly Prezidentimize, türkmen halkynyň Milli Lideri Gahryman Arkadagymyza çäksiz alkyş sözlerini aýtdylar.
Maslahatyň institutymyzyň döredijilik topary tarapyndan taýýarlanan aýdym-sazly çykyşlar bilen utgaşyp gitmegi baýramçylyk gününe has-da täsirli öwüşgin çaýdy.
Aýperi BAÝRAMDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
I ýyl talyby.