Kämillige badalga
2022-nji ýylyň 13-nji maýynda Türkmenistanyň Daşary işler ministrliginiň Halkara gatnaşyklary institutynda tejribeli žurnalistleriň gatnaşmagynda Ýaş diplomatlaryň mekdebiniň agzalary üçin «Žurnalistikada kämillige ýetmegiň ýollary» temasy boýunça okuw sapagy geçirildi.
Sapagyň dowamynda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň mugallymlary žurnalistika hünäri dogrusynda giňişleýin gürrüň berdiler. Çykyşlarda žurnalistika hünäriniň inçe tilsimlerini ele almagyň tärleri beýan edildi. Mundan başga-da, her bir žurnalistiň ukyp-başarnyklary yzygiderli kämilleşdirilip durulmalydygy aýratyn nygtaldy. Sapagyň dowamynda Ýaş diplomatlaryň mekdebiniň agzalary mugallymlara žurnalistika ugrundan gyzyklanýan soraglaryny berip, olar hakynda giňişleýin maglumat aldylar. Şeýle sapaklaryň yzygider geçirilip durulmagy ýaşlaryň ir döwürden başlap žurnalistika hünär bilen ýakyndan meşgullanmagyna ýardam edýär.
Senemgül ALLAKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy hünäriniň I ýyl talyby.