Işjeň talyplaryň üstünligi
2022-nji ýylyň 5-nji dekabrynda S.A.Nyýazow adyndaky Türkmen oba hojalyk uniwersitetiniň gurnamagynda talyplaryň arasynda I Açyk Halkara Ekologiýa Internet olimpiadasy geçirildi. Bu onlaýn olimpiadada Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 3-nji ýyl talyby Bilbil Berdiýewa we Halkara žurnalistikasy fakultetiniň 5-nji ýyl talyby Sona Halykowa dagylar üstünlikli çykyş edip, III orna mynasyp boldular.
Mundan başga-da, ýaňy ýakynda institutyň Halkara ykdysady gatnaşyklary fakultetiniň 2-nji ýyl talyplary Kerim Jumabaýew we Resul Gylyjow talyplaryň we ýaşlaryň Bütinrussiýa festiwalynyň çäklerinde Çuwaş döwlet uniwersitetiniň gurnamagynda geçirilen ylmy-barlag işleriniň Halkara bäsleşiginiň ýeňijileri boldular. Dünýä dilleri kafedrasynyň mugallymy Tylla Babaýewanyň ylmy ýolbaşçylygynda K.Jumabaýewiň “Türkmenistanyň Russiýanyň “KAMAZ” kärhanasy bilen hyzmatdaşlygy: gazanylan tejribe we geljegi” we R.Gylyjowyň “Parahatçylyk pikirlerini öňe sürmekde we pugtalandyrmakda ÝUNESKO klublarynyň orny” atly rus dilinde ýazan ylmy işleri I we II derejeli diplom bilen sylaglanyldy. Talyp deň-duşlarymyzyň bu üstünlikleri bizi buýsandyrýar.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň II ýyl talyby,
Durnukly Ösüş Maksatlarynyň Ýaş ilçisi.