HOŞALLYK MASLAHATY GEÇIRILDI
2026-njy ýylyň 9-njy maýynda Türkmenistanyň Daşary işler ministrliginiň Halkara gatnaşyklary institutynda taryhy ähmiýetli täze başlangyçlara bagyşlanan dabaraly hoşallyk maslahaty geçirildi. Bu hoşallyk maslahaty hormatly Prezidenrtimiziň kabul eden Kararyna laýyklykda, institutyň işini has-da kämilleşdirmek, täze gurluşy tassyklamak, Parahatçylyk we bitaraplyk kafedrasyny açmak hem-de 2026-2027-nji okuw ýylyndan başlap, degişli ugur boýunça magistrleri taýýarlamaga döredilen giň mümkinçiliklere bagyşlandy.
Mälim bolşy ýaly, Hormatly Prezidentimiziň ýurdumyzyň diplomatik gullugynyň maddy-enjamlaýyn we ylmy-usulyýet binýadyny kämilleşdirmek baradaky Karary ýokary okuw mekdebiniň professor-mugallymlarynyň we talyp ýaşlarynyň kalbynda çuňňur buýsanç döretdi. Bu taryhy resminama laýyklykda institutyň gurluşynyň döwrebaplaşdyrylmagy, aýratyn-da, täze kafedranyň döredilmegi ýurdumyzyň ylym-bilim ulgamynda täze sahypany açýar.
Maslahatda bellenilişi ýaly, Halkara gatnaşyklary institutynda talyplaryň dünýä ölçeglerine laýyk bilim almagy üçin ähli şertler döredilendir. Institutyň maddy-enjamlaýyn binýadynyň yzygiderli berkidilmegi, sanly bilim ulgamynyň işjeň ornaşdyrylmagy we okuw binalarynyň iň döwrebap tehnologiýalar bilen enjamlaşdyrylmagy geljekki diplomatlaryň hünär derejesiniň ýokary bolmagyna gönükdirilendir. Bu ýerde ýaşlaryň diňe bir nazary bilimleri däl, eýsem, tejribe endiklerini hem kämilleşdirmegi üçin döredilen mümkinçilikler döwletimiziň ylym-bilim syýasatynyň aýdyň miwesidir.
Täze açyljak Parahatçylyk we bitaraplyk kafedrasy Türkmenistanyň hemişelik Bitaraplyk hukuk ýagdaýynyň, parahatçylyk söýüjilikli daşary syýasat ugrunyň ylmy-nazary esaslaryny düýpli öwrenmekde we wagyz etmekde esasy merkezleriň birine öwrüler. 2026-2027-nji okuw ýylyndan başlap, "Parahatçylyk we bitaraplyk" ugry boýunça magistrleriň taýýarlanyp başlanmagy bolsa, halkara arenasynda döwletimiziň bähbitlerini ýokary derejede gorajak, giň dünýägaraýyşly hünärmenleriň täze neslini kemala getirer.
Hoşallyk maslahatyna gatnaşyjylar döwletimiziň halkara abraýyny belende götermekde, parahatçylyk medeniýetini dabaralandyrmakda we bilim ulgamyny ösdürmekde döredilýän giň mümkinçilikler üçin Arkadagly Gahryman Serdarymyza çäksiz sagbolsunlaryny aýtdylar.
Bu täze gurluş milli diplomatiýamyzyň ylmy kuwwatyny artdyrmak bilen, geljekki diplomatlaryň dünýä derejesindäki garaýyşlarynyň kemala gelmegine uly goşant goşar.
Mähriban GANDYMOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy