Hindistan Respublikasynyň Türkmenistandaky Adatdan daşary we Doly ygtyýarly ilçisi bilen duşuşyk geçirildi
2022-nji ýylyň 22-nji aprelinde Türkmenistanyň Daşary işler ministrliginiň Halkara gatnaşyklary institutynda Türkmenistan bilen Hindistan Respublikasynyň arasyndaky diplomatik gatnaşyklaryň ýola goýulmagynyň 30 ýyllygy mynasybetli Hindistan Respublikasynyň Türkmenistandaky Adatdan daşary we Doly ygtyýarly ilçisi Widhu Pithambaran Nairi bilen institutyň wekilleriniň arasynda duşuşyk geçirildi.
Duşuşygyň dowamynda ilçi diplomatik gatnaşyklaryň ýola goýulmagynyň ilkinji günlerinden başlap, Türkmenistan bilen Hindistan Respublikasynyň arasynda ähli ugurlar boýunça uzakmöhletleýin we özara bähbitli hyzmatdaşlygyň ösdürilmegine aýratyn ähmiýet berilýändigini belledi. Aýratyn-da, ilçi söwda-ykdysady, ylym-bilim, medeniýet we beýleki möhüm ugurlar boýunça hyzmatdaşlygyň giňeldilýändigini nygtady. Şeýle hem, Hindistan Respublikasynyň Türkmenistandaky Adatdan daşary we Doly ygtyýarly ilçisi 2022-nji ýylyň 3-nji aprelinde Hindistan Respublikasynyň Prezidentiniň gatnaşmagynda açylan «Hindi burçunyň» talyplaryň Hindistan baradaky gyzyklanmalaryny has-da artdyrjakdygyny belledi.
Gapbar Hallyýew,
Türkmenistanyň Daşary işler ministrliginiň
Halkara gatnaşyklary institutynyň mugallymy.