HALYPA DIPLOMAT BILEN USSATLYK SAPAGY
2024-nji ýylyň 6-njy iýunynda Türkmenistanyň Daşary işler ministrliginiň Halkara gatnaşyklary institutynda “Ýaş žurnalistler” ylmy-döredijilik gurnagynyň guramagynda halypa diplomat bilen ussatlyk sapagy geçirildi. Ussatlyk sapagyny halypa diplomat, Türkmenistanyň Adatdan daşary we Doly ygtyýarly ilçisi Nurberdi Amanmyradow alyp bardy. Täsirli geçen ussatlyk sapagyna institutyň höwesjeň talyplary we mugallymlary gatnaşdylar.
Halypa diplomat Nurberdi Amanmyradow okuw sapagynyň dowamynda talyplara diplomatik işiniň aýratynlyklary, dünýädäki esasy syýasy wakalaryň sebäpleri we geçirilýän uly göwrümli çäreleriň ähmiýeti dogrusynda gürrüň berdi. Şeýle-de talyplara geljekki syýatçylar hökmünde syýasy düşünjelerini artdyrmagy, munuň üçin esasy okamaly kitaplary, edebiýatlary maslahat berdi.
Geçirilen bu okuw sapagy talyplaryň geosyýasy düşünjesiniň artmagyna, halkara derejesinde bolup geçýän syýasy wakalara seljerme bermek başarnygynyň kämilleşmegine, özlerini gyzyklandyrýan soraglara jogap tapmaklaryna ýardam berdi.
Halypa diplomat Nurberdi Amanmyradow okuw sapagynyň dowamynda talyplaryň berýän soraglaryna giňişleýin jogaplary berdi. Sapagyň ahyrynda talyplar halypa diplomata beren gürrüňleri we öwüt-nesihatlary üçin köp sagbolsun aýdyp, ýeneki günlerde-de şeýle duşuşyklaryň geçirilip durmagyna uly gyzyklanma bildirýändiklerini beýan etdiler.
Okuw sapagynyň ahyrynda oňa gatnaşyjylar halypa-şägirtlik ýoluny mynasyp dowam etmäge, talyplaryň ussat halypalar bilen yzygiderli duşuşyp, olardan peýdaly öwüt-nesihatlary almaklaryna ähli mümkinçilikleri döredip berýän hormatly Prezidentimize, türkmen halkynyň milli lideri Gahryman Arkadagymyza köp sagbolsun aýtdylar.
Mähriban HUDAÝGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
IV ýyl talyby.