Halkara ýaşlar forumy mynasybetli çäre geçirildi
2023-nji ýylyň 27-nji dekabrynda paýtagtymyz Aşgabat şäherindäki Söwda-senagat edarasynyň binasynda Arkadag Serdarly bagtyýar ýaşlar ýylyna bagyşlanan türkmen ýaşlarynyň bilim, ylym, sport, medeniýet, senagat, oba hojalygy we ykdysadyýetiň dürli ugurlarynda gazanan üstünliklerini görkezýän ýaşlaryň dabaraly maslahaty we sergisi geçirildi. Munuň özi Arkadag Serdarly bagtyýar ýaşlar ýylynyň ajaýyp jemlenmesine öwrüldi. Foruma we köp ugurly sergä ýurduň ösüşine mynasyp goşant goşýan ýaş nesliň wekilleri gatnaşdylar.
Türkmenistanyň Daşary işler ministrliginiň Halkara gatnaşyklary institutynda talyplarymyz bu halkara ylmy-amaly maslahata, geçirilen sergilere, şeýle hem ýaşlarymyzyň sylaglandyryş dabarasyna sanly ulgam arkaly onlaýn tomaşa etdiler. Munuň özi biz türkmen ýaşlaryny diýseň buýsandyrýar. Sebäbi Arkadagly Gahryman Serdarymyzyň aýdan her bir öwüt-nesihatlary biziň üçin görelde mekdebi bolup durýar. Geljekki halkaraçy hünärmenleri ýokary derejede taýýarlamakda bu geçirilen halkara ýaşlar forumy özüniň oňyn netijesini berdi. Şeýle hem bu geçirilen dabaralar ýaşlaryň durmuşynyň möhüm senesine öwrüldi we taryhymyzyň sahypalaryna altyn harplar bilen ýazyldy.
Biz ýaşlar üçin okamaga, öwrenmäge, döretmäge, ähli ulgamlarda kämilliklerimizi artdyrmaga ajaýyp mümkinçilikleri döredip berýän Gahryman Arkadagymyza, Arkadagly Gahryman Serdarymyza köp sag bolsun aýdýarys! Goý, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzyn bolsun, il-bähbitli, ýurt ähmiýetli alyp barýan tutumly başlangyçlary hemişe rowaçlyklara beslensin!
Intizar TAGANNYÝAZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.